“San Miguel Parish-Panacan, Miduyog sa Paglunsad sa Synod 2021-2023”

“Asa na man ako sa akong pagtoo, nahiusa ba ako sa Simbahan, mitabang ba ako sa Simbahan sa iyang paglambo… mipaambit ba ako… gituman ba nako ang akong misyon?”… Pipila lamang kini sa mga gipaambit sa Kura Paruko sa San Miguel Parish Panacan nga si Rev. Fr. Mervin George Maglana, DCD, sa iyang homiliya atol sa pagsaulog sa paglunsad sa mga Pre-Synodal Consultations sa parokya, niadtong ika-17 sa Oktubre, adlawng Dominggo, sa alas 7:30 sa buntag. Kabahin kini sa pakigduyog ngadto sa kinatibuk-ang Simbahang Katoliko sa kalibutan sa pagsugod sa mga prosesong synodal isip pagpangandam sa pagahimuong sinodo.

Kini subay sa panawagan sa atong Santo Papa Francisco nga magtigum uban kaniya sa usa ka Sinodo sa mga Obispo (Synod of Bishops) sa umaabot nga Oktubre 2023. Ang pagahimuong Synod 2021-2023 nga adunay tema “For a Synodal Church: Communion, Participation and Mission”, pormal nga gilunsad sa Santo Papa niadtong Oktubre 10 (adlawng Dominggo), pinaagi sa Santos nga Eyukaristiya, didto sa Basilica ni San Pedro sa Vaticano.

“A synodal Church is a Church which listens” – Pope Francis. Sa paghimo sa oportunidad alang sa pagpamati ug diyalogo sa lokal nga lebel pinaagi niini nga Sinodo, ang Santo Papa nagtawag sa Simbahan nga tukion pag-usab ang lawom niini nga kinaiyang sinodo. Kini nga pagkaplag pag-usab sa mga sinodal nga gamot sa Simbahan mamahimong mapaubsanong proseso sa pagkat-on kung giunsa kita sa pagtawag sa Diyos nga mamahimong usa ka Simbahan sa ikatulo nga milenyo. Molungtad ang pagpangandam sa tibuok simbahan alang sa Sinodo sa mga Obispo sulod sa duha ka tuig diin kabahin sa pagpangandam ang paglambigit sa mga Katawhan sa Diyos aron madungog ang ilang tingog mahitungod sa ilang mga kasinatian sa ilang lokal nga Simbahan ug aron mahatagan og higayon ang tibuuok Katawhan sa Dios nga magkahiusa sa pag-ila kung unsaon pagpadayon ngadto sa dalan padulong sa pagkahimong usa ka labi ka synodal nga Simbahan sa umaabot nga mga katuigan.

Gisugdan ang Santos nga Eyukaristiya pinaagi sa pagpanalangin sa tubig ug sa pagbasbas usab sa mga parokyano nga mitambong sa maong selebrasyon. Gihatagan og gimbug-aton ni Fr. Mervin ang hulagway sa pagka-misyonaryo diin ang matag usa nakiglambigit sa atong mga kaigsoonan, ug isip mga binunyagan, kita usab nakaambit sa maong gasa isip mga misyonaryo. “Sa atong pagka-Kristiyano, kita mga piniyalan… kita gitawag sa pagpaambit niini [stewardship]… ug daghan ang pamaagi aron ipadayag nato ang atong pagka Simbahan…,” dungag pa niya. Gipahinumduman ni Fr. Mervin ang tanan alang sa pagpamalandong sa nagkadaiyang misyon nga gipiyal sa matag-usa – ang pagpaambit ug pagtugyan sa kaugalingon alang sa pamilya, sa isigkatawo, sa katilingban ug sa Simbahan.

Gitapos ang Santos nga Eyukaristiya pinaagi sa Pag-ampo sa Sinodo, uban sa mga imahe ni Sto. Niño, sa Krusipiho, ug ni Birhen Maria isip mga dugang nga simbolo nga makapadasig sa mga tawong gitahasan sa maong kalihukan. Gipadala usab ang mga piniling miyembro sa Parish Pre-Synodal Consultation Facilitating Team nga mao sila Marilou Ipal (Head Catehist), Lilibeth Ramirez (GKK Coordinator), Cindy Quezon (PYA Coordinator), Francis Harvey Rivas (Arkanghel-Technical Team Head), ug Melard Libre (Pastoral Office). Sila ang gimugna nga grupo sa maong parokya nga gisaligan ug gitahasan sa pagpasayon sa mga kalihukan sa maong pagpangandam sa Sinodo diha sa lebel sa parokya. (Ma. Joneila B. Laruya, SMPYA Soccom / Lit Diana, Parish Soccom)