Ang Pagsulay sa Paghigugma

Dear Ate Emz,

Ako si Arnel 35 anyos ulitawo ug taga Davao del Norte. Dunay permananteng trabaho sa usa ka inilang plantasyon sa Sagingan sa among lugar. Akong kasinatian mahitungod sa akong gugma ngadto kang Richelle, akong girlfriend kaniadto. Akong mahinumduman sulod sa tuig 2005 ngadto 2007 nga kami nagkauyab ni Richelle. Nianang mga tuiga, mitabang ako sa suportang pinansiyal nganha sa iyang pag eskwela sa UM Tagum ug kaluoy sa Ginoo nakahuman siya sa kursong Education.

Human niana milabay ang upat ka tuig gikan sa iyang pag graduate, tuig 2014 kadto mi desisyon siya nga mu abroad sa Dubai. Wala na akoy daghan estorya pa ug misugot kay lagi musoporta sa iyang kagustohan ug alang sa among kaugmaon. Dako akong pagsalig niya. Mga pipila ka tuigan ang milabay wala na siya nagparamdam nako, tuig 2018 kadto. Waly tawag o video call hangtud sa akong nahibaw-an gikan sa iyang mga higala nga duna na diay laing BF si Richelle. Sakit kaayo para nako ang mga panghitabo kay wala man koy maisip nga hinungdan o igong rason ug ngano kini niya gibuhat.

Akona na lang gidawat ang tanan bisan sakit ug sa hinay-hinay ako naka move on. Milabay ang usa ka tuig 2019 kining among silingan nga akong kababata sama ra mi ug pangidaron Babae ug ginganlag Mary Ann. Usa ka Teacher sa among lugar. Pareho mi nga mga aktibo sa mga kalihukan sa Simbahan ug GKK. Gikan sa pagka SFC kon Singles For Christ ug pareho sab mi nga mga Lector.

Nahulog akong loob ug akong gipakita ang akong interes nganha niya apan way swerte. Wala milampos ang akong pagpakita ug motibo. Sa laktud nga pagkasulti na basted. Sa akong ka-ulaw wala ko mi renew sa akong katungdanan isip Lector sa among GKK.

Sakit nga paminawun kay matud pa sa iyang mga ginikanan miingon nga dili daw kuno mi bagay ug dili angay nga pangasaw-on kay ubos ra akong estado kumpara niya. High school ra akong nahuman. Usahay maka pangutana ko nga aduna diay sukdanan ang gugma nganha sa imong nahuman. Wala jud siguro koy swerte sa gugma. Angay pa ba nga magpaabot ko niya?

Dinhi na lang kutob ug daghang salamat.
Arnel

* * * * * *

Dear Arnel,

Saludo ako sa imong pagkamanggihatagon sama sa pagtabang nimo kay Richelle aron makahuman gyud siya sa kolehiyo. Dugang pa niini, imo sad siyang gitugutan nga makapagtrabaho sa laing nasod aron makab-ot ang inyong mga pangandoy sa kinabuhi. Timailhan lamang kini nga handa ka magsakripisyo alang sa kaayuhan ninyong duha ug pangandam sa inyong umaabot.

Ang gugma moagi gyud sa lain-laing mga pagsulay, sama sa panahon ug distansiya sa usag-usa. Lisud kaayo ang pag mintinar og LDR (Long Distance Relationship). Hinuon makatabang gyud ang teknolohiya nga mahimong tulay aron makakonektar sa mga mahal sa kinabuhi. Lisud kini nga sitwasyon, mao nga kinahanglan gyud ang pagsalig sa usag-usa. Daghang mga tintasyon ang masinati labi na kung ang kamingaw o homesickness ang bation. Busa, dili ikatingala nga usahay mangita ug makahalubilo labi na ang naa sa laing nasod aron maibsan ang gibati. Usa pud sa mga tintasyon mao ang ginaingon nila nga “out of sight, out of mind.” Sa kabahin ni Richelle, siguro naa siya’y nakita didto nga sa tan-aw niya mas labaw pa sa imoha. Bisan pa masakit sa imong kabahin, kinahanglan mag let go ug mag move on na. Mao kini ang pagkamaayong buhat nga mahatag nimo sa imong kaugalingon.

Ang gugma nga imong nasinati grasya gihapon kini gikan sa Ginoo bisan pa sa ikaduhang higayon, nabasted pud ka tungod sa panglantaw nga dili kamo bagay kay wala ka nakahuman sa kolehiyo. Ang paghuman sa kolehiyo dili garantiya nga mahimong malampuson ang kinabuhi sa usa ka tao. Unsa man gani ang rason, magpasalamaton lang gihapon ka sa mga higayon nga nakilala mo sila Richelle ug Mary Ann, ang duha ka babaye nga imong “nakatagpo pero hindi tinadhana”. Sumala sa uban, “it is better to have loved and lost than not to have loved at all.” Ang Ginoo naay laing plano alang kanimo, salig lang Kaniya.The best is yet to come, do not lose hope. Meanwhile, value the lessons you learned from these relationships for they help you grow into a better person.

Hinaut unta nga malampasan nimo ang kaulaw nga imong gibati sa kasamtangan ug mahimo kang magpamaubsanong mobalik sa pagserbisyo diha sa inyong GKK. Ang Ginoo dili mobiya kanimo, atimanon gyud ka Niya, busa, ayaw biyai ug buhii ang Iyang mga kamot nga maoy nagagiya kanimo sa tanang adlaw sa imong paglawig ning kalibutan.

Bear in mind that just as when things seem to be hopeless, God comes to lift us up, even higher than we expect.

God bless you more.
Ate Emz