Ang Matuod nga Hari

Solemnidad sa Kristong Hari (November 21, 2021)
Dn 7:13-14 / Ps 93:1, 1-2, 5 / Rv 1:5-8 / Jn 18:33-37

Kinsa ang hari alang sa mga Judeo o bisan gani alang sa kalibutan karon? Alang sa mga Judeo o sa panglantaw sa kalibutan, ang hari adunay bahandi og palasyo nga gipuy-an sa kalibutan; adunay trono; adunay gahum sa pagpatay og sa pagbuhi sa iyang ginsakpan; mahimong ginoo alang sa katawhan; paga-tamdon sa tanan; siya labaw sa tanang katawhan, gipanalipdan sa iyang ginsakpan busa adunay mga sundalo. Ang katawhan motahud kaniya ug makig-away aron pagpanalipod kaniya. Mao kini ang larawan sa atong gihisgutan nga si Pilato ning atong ebanghelyo. Buot niya nga panalipdan ang iyang autoridad ug posisyon. Aduna siyay oportunidad unta sa pagkaamgo sa kamatuoran pinaagi sa pagpaminaw sa gisangyaw ni Jesus, sa pagpanalipod sa prinsipyo nga matarung, apan gipili niya ang iyang kaugalingong interes. Midapig siya sa unsay gipangayo sa katawhan o sa publiko. Gisakripisyo niya ang iyang prinsipyo og moral nga mga bili. Siya ang bakakon nga hari.

Ang hari alang kang Cristo? Ang iyang trono mao ang krus; naghari siya pinaagi sa pag-alagad sa katawhan; ang iyang gahom mao ang makaluluwas nga gugma. Siya ang tigpanalipod, mosagang og gani mohatag sa iyang kinabuhi alang kanato. Ang iyang kabubut-on mao ang paghatag kanato sa kinahubing dayon busa iyang gihalad ang iyang kinabuhi alang sa atong kaluwasan. Ang iyang autoridad mao ang pagpasaylo ug pagpahiuli kanato ngadto sa mahigugmaong mga bukton sa iyang Amahan. Si Jesus, diha sa atubangan sa kamatayon ug sa kalibutanong hari, nagpabilin nga malinawon, nagpakahilom, nagpaubos, nagmasinugtanon sa unsa may sentensya kaniya aron atong maamgohan nga ang matuod nga hari anaa sa unsa man ang iyang gisangyaw. “Ang labing dakung gugma nga ikahatag sa usa ka tawo ngadto sa iyang mga higala mao ang paghatag sa kaugalingon niyang kinabuhi alang kanila. Kamo akong mga higala kon buhaton ninyo ang gisugo ko kaninyo.” (Jn 15:13-16). Ang matuod nga pagkahari mao ang pag-alagad. Ang matuod nga pagkahari mao ang pagluwas niadtong iyang giamumahan. Ang matuod nga pagkahari mao ang pagdala sa katawhan ngadto sa kaayuhan og kalipay nga walay katapusan. Pamalandong: Kinsa man ang naghari sa atong kinabuhi karon? Ang matuod ba nga hari o ang bakakon nga hari?