Lihok sa Pagkamaayo Atubangan sa Dios

Ika-32 nga Domingo sa Ordinaryong Panahon (November 7, 2021)
1 Kgs 17:10-16 / Ps 146:7, 8-9, 9-10 / Heb 9:24-28 / Mk 12:38-44 Or Mark 12:41-44

Ang atong mga pagbasa karon naghulagway sa pagkamanggihatagon. Ang atong unang pagbasa nagpadayag nga si propeta Elias miadto ngadto sa usa ka lungsod nga adunay mipuyo didto nga usa ka biyuda nga diin ang maong lungsod nakasinati ug dakong gutom ug aduna na lamay pipila ka pudyot sa harina ug gamay nga lana ang nahibilin kanila apan si Propeta Elias mihangyo sa maong biyuda nga lutuon kini ug gibuhat sa maong biyuda sama gayod sa giingon sa propeta. Ang maong kasinatian dili usab halayo diha sa kasinatian sa atong Ebanghelyo karon nga diin adunay usa ka kabus biyuda didto nga mihatag sa unsa ang anaa kaniya.

Diha sa atong mga kasinatian usahay magpatigbabaw nga unahon gayod ang atong kaugalingon ug isunod ang uban. Apan diha sa atong mga pagbasa karon nagpakita kini nga mas giuna ang paghatag ngadto sa uban kaysa ilang mga kaugalingon. Gidayeg ni Jesus ang maong mga buhat apan lisod kining maong buluhaton nga gusto nga ipabuhat kanato sa atong Ginoo. Apan dili usab kini imposible nga mahitabo kanato tungod kay kita isip mga magtutuo ug sumusunod kang Cristo kita kanunay nga gihagit sa pagpuyo sa susamang pagbuhat.

Apan unsa gayod ang pagtulon-an nga gusto ni Jesus nga itudlo kanato? Gusto sa atong Ginoo nga mamahimo kitang manggihatagon sama sa biyuda nga giduolan ni propeta Elias ug sa biyuda nga anaa sa atong Ebanghelyo nga nakita sa atong Ginoo. Sila walay lipod-lipod nga mihatag sa tanan nga anaa kaniya. Ug mao kana ang gusto sa atong Ginoo, nga ang atong pagkamanggihatagon nagsukad gayod diha sa atong dakong pagsalig ngadto Kaniya. Matud pa, nga ang sukdanan sa Diosnong hustisya dili ang gidaghanon sa gihatag, apan ang kanasingkasing sa paghatag ang basehan. Dugang pa niana, ang biyuda nga naghulog ug duha ka sinsilyo isip iyang gasa ngadto sa templo labaw pa kaysa gihatag sa mga adunahan. Walay lihok sa pagkamaayo nga walay kahulogan atubangan sa Dios, ug walay kaluoy nga nahibiling walay bunga.

Sa katapusan, ang atong Dios mihatag sa iyang kaugalingon alang sa tanan. Bisan kon siya Dios apan nagpakatakus siya nga mopuyo sama kanato ug mihatag sa iyang kaugalingon hangtod sa paglansang didto sa krus. Kini mao ang hagit kanatong mga sumusunod ni Kristo. Ang Dios nga nagpadayag sa iyang dakong gugma alang sa iyang katawhan. Sa ingon, andam ba kita mohatag sa tanan nga anaa kanato ngadto sa uban? (Bro. Zoren Abellanosa)