Kumpirmasyon, Gasa sa Espiritu Santo, Luyo sa Pandemya

“Sacraments are moments… kani nagapahinumdom sa atoa sa pagkaanaa sa Espiritu Santo sa atong kinabuhi…” – Most Rev. Romulo G. Valles, D.D., Archbishop of Davao.

Matag Setyembre, nabatasan na sa mga parokyano sa San Miguel Parish sa Panacan ang pagpahigayon sa usa sa pito ka sakramento nga gitukod ni Hesukristo – ang Sakramento sa Kumpirma. Kini gipahigayon niadtong Setyembre 25, adlawng Sabado sa alas-nuwebe sa buntag, ug gipangulohan kini sa atong halangdong Arsobispo sa Dabaw, Most. Rev. Romulo G. Valles. D.D. Nakumpirmahan ang 116 ka mga parokyano sa San Miguel Parish Panacan, ug makita sa matag usa kanila ang dakong kalipay sa ilang pagdawat sa Espiritu Santo sa ilang tagsa-tagsa ka kinabuhi.

Gipahigayon ang Sakramento sa Kumpirma subay sa pito ka lakang – ang pagbasa sa mga basahon nga adunay kalambigitan sa maong selebrasyon, ang pagpresenta sa mga kumpirmahanan atubangan sa Obispo, ang paghatag sa Homiliya, ang Pagbag-o sa mga Saad sa Bunyag, ang pagpandong sa mga kamot sa Obispo sa kumpirmahanan, ang pagdihog sa Santa Lana sa nagkadaiyang mga agtang sa kumpirmahanan ug ang pagpadayag sa mga Katilingbanong Pag-Ampo.

“Ang Katolikong pagtoo, the Catholic Faith… taliwala sa kalisod and restrictions, atong ginapakita karon [Kumpirmasyon] nga naay value kini… nga importante kini sa atong kinabuhi,” matod pa ni Abp. Valles sa iyahang homiliya. Iyaha usab gihatagan og gibug-aton ang pagdasig sa mga tawo sa pagpabakuna kay kini usa ka buhat sa paghigugma kon “Act of Love” matod pa ni Santo Papa Francisco.

Gitapos ni Abp. Valles ang Santos nga Misa sa malipayon nga pagdayeg sa parokya sa han-ay nga pagpahigayon sa Kumpirmasyon. Ingon man sa pagdumala sa Kura Paroko nga si Rev. Fr. Mervin George A. Maglana, DCD ug dinuyogan sa iyahang Parochial Vicar nga si Rev. Fr. Efren A. Gubac, Jr., DCD. Iyaha usab gi-ila ang mga paningkamot sa mga nangandam sa maong kasaulogan, lakip na ang mga Katekista sa Parokya, mga GKK Servant Leaders (GSLs), mga ushers, nga mga madasigong miyembro sa Parish Youth Apostolate (PYA), mga magbabasa, komentarista, ug labaw sa tanan, iyahang gipasidunggan ang mga bag-ong gipangkumpirmahan. (Ma. Joneila B. Laruya)