GKK – Kara-an na apan Bag-o pa gihapon!!!

Pasiuna:

Unsa diay ang Gagmay’ng Kristohanong Katilingban (GKK)?

Gitawag kini nga bag-ong paagi sa pagpuyo isip Simbahan!

(A new way of being church!).

Nganong mitumaw ang maong pagsabot sa GKK?  Subayon nato ha,

Ang Baticano II naghulagway sa simbahan isip usa ka misteryo, dili simenteryo!  Misteryo kay gilangkuban sa pagka tawhanon og pagka espirituhanong realidad     (Lumen Gentium # 1).

Tawhanong realidad kay ang mga sakop niini mga Tao (naay unod, dugo ug bukog!) nga adunay kalig-on ug kahuyang sa kinabuhi. Apan ang simbahan dili lamang tawhanong katilingban, kondili espirituhanong  realidad kay kini gitukod ni Hesus pinaagi sa Espiritu Santo aron sa pagpadayon sa misyon nga gisugdan Niya diha sa pagpakaylap sa Gingharian sa Dios Amahan.

Si kanhing Santo Papa Paulo VI miingon nga ang simbahan usa ka misteryo.  Usa ka realidad diin kini gipuy-an sa dili makita nga presensya sa Dios.  Ang kinaiya sa Simbahan nga kanunay kini abli sa mga    bag-o ug lawom nga pagsabot (Lumen Gentium # 1).  Sa laing pagkasulti, ang simbahan dili masabtan sa tawhanong panghunahuna lamang.  Mas makatabang nga sabton kini sa mata sa pagtoo.  Dili matugkad ang kalawom sa realidad sa simbahan.  Kinahanglan kanunay abli sa pamalandong ug pagsabot niini.

Ang Simbahan nahulagway nga katawhan sa Dios, Lawas ni Kristo ug lain pa.  Sa kasamtangan, gihatagan ug kabug-aton ang Simbahan isip katilingban sa mga misyonaryong disipulo! (Evangelii Gaudium # 24).  Sama sa bungang kahoy (fruit tree), ang simbahan nagsugod sama sa liso, mitubo, milambo, nagsanga-sanga ug namungag daghan!

Luyo niining hamubong sumada sa batakang pagsabot sa Simbahan, ang GKK mao ang konkretong hulagway sa simbahan nga nagabag-o diha sa katilingban (PCP II). Mao nga ang GKK gihulagway isip bag-ong paagi sa pagpuyo isip katawhan sa Dios, o Lawas ni Kristo nga nagatubo sa pagtoo.  Sa Atoa pa ang GKK Katilingban sa matuohon nga kanunay nagabag-o. Bag-ong paagi kay ang naandan dili na epektibo o makatubag sa misyon sa simbahan luyo sa dagan sa kapanahunan.

References:    Lumen Gentium (Light of all Nations: Vatican II, 1962-1965)

PCP II (Second plenary council of the Philippines, 1991)

Evangelii Gaudium (Joy of the Gospel, 2013)

Ipadayon… Topic: GKK isip panglantaw.

(+George B. Rimando)