Kamanggihatagon ug Kadasig, Sentro sa Ika-35 nga Kapistahan sa Parokya

Taliwala sa nagpadayong pandemya nga nasinatian gisaulog sa parokya sa St. Mary of the Perpetual Rosary Parish, Buhangin, Davao City ang ika-35 nga kapistahan inubanan sa tema nga: “Birhen Maria, sumbanan sa kinaiya nga manggihatagon uban sa kadasig ug kalig-on taliwala sa mga pagsulay”.

BALIK LANTAW. Pinaagi sa Board of Consultors nga gipangulohan sa kanhing Arsobispo sa Arkidyosis sa Dabaw nga si Arsobispo Antonio Ll. Mabutas gi aprobahan ang pagtukod sa Parokya sa St. Mary of the Perpetual Rosary Parish niadtong Mayo 31, 1987. Tungod sa ilabihan nga pagsuporta ni kanhing Arsobispo Mabutas sa mga proyekto sa Confraternity of Perpetual Rosary Movement (CPRM) ug ingon nga nag-unang naglihok sa maong kalihukan, iyang gi-aprobahan ang paghalad sa bag-ong parokya sa debosyon sa CPRM ngadto sa Birhen sa Balaang Rosaryo. Niini, mihatag siya sa opisyal nga pangalan sa parokya nga mao ang: “St. Mary of the Perpetual Rosary Parish”, kansang kapistahan pagasaulogon sa matag unang Domingo sa bulan sa Oktubre.

Si Msgr. Maximo Sarno mao ang unang kura paroko sa St. Mary of the Perpetual Rosary Parish gikan sa tuig 1987 hangtud 1991. Siya nasundan pa sa pito (7) ka mga kura paroko nga maoy nagpadayon sa pagpalambo sa parokya ug sa pagdumala sa mga parokyano niini.

Pinaagi sa kasamtangang Kura Paroko, Rev. Fr. Dionisio “Diony” Tabiliran nagpadayon ang pagpalambo ug mga kaayohan sa parokya taliwala niining pandemya. Nagpahigayon gihapon og mga aktibidades atol sa pagsaulog sa kapistahan. Adunay gihimong pagnobena ug pagsaulog sa Santos nga Misa nga nagsugod kaniadtong Septiyembre 24 hangtud Oktubre 02, 2021 sa alas 5:30 sa hapon. Sa dili pa magsugod ang Santos nga Misa paga-ampoon ang Santos nga Rosaryo sa alas 4:30 sa hapon.

Ipahigayon ang GKK Marian Pilgrimage sa napulo (10) ka mga sona nga nahisakop sa parokya. Kini nagsugod kaniadtong Septiyembre 22 hangtud Oktubre 01, 2021. Ang Imahe sa Mahal nga Birhen magpabilin og usa ka gabii sa host GKK sa matag sona diin ang motambong nga katawhan adunay pagahimoon nga pagbihilya, pag-ampo sa rosaryo ug paghalad og mga bulak. Ang mga host chapel sa maong panawduaw sa Mahal nga Birhen mao kining mosunod: sona 1-Sta. Teresita, Green Orchard Village, Cabantian, sona 2-San Vicente Ferrer, Suraya, Cabantian, sona 3-Our Lady of All Nation, Greenland2, Cabantian, sona 4-Sto. Niño, Green Valley, Communal, sona 5-San Roque, Emilia Homes, Cabantian, sona 6-San Isidro Labrador-1, Buhangin, sona 7-Christ the King, Bread Village, Buhangin, sona 8-San Isidro Labrador, Juliville, Tigatto, sona 9-San Isidro Labrador, Tigatto 8, sona 10-St. Jude, Buhangin. Adunay caravan procession nga pagahimoon sa Oktubre 2, 2021. Ang Pontifical Mass saulogon sa Oktubre 3, 2021 (Domingo) sa alas 8:00 sa buntag.

Dili usab mawala ang mga kompetisyon nga ipahigayon sa adlaw sa kapistahan. Kini mao ang gitawag nga MAKASAMA Festival nga nagkahulugang “MA-saligon ug matuohon nga KA-tawhan uban ni SA-nta MA-ria”. Adunay Choral ug Dance Competition nga pagasalmutan sa mga GKK Servant Leaders ug mga miyembro sa matag sona. Kining maong mga pasundayag gihimo virtually isip pagsunod sa health protocols nga gi-implementar sa atong lungsod.

Daghang mga pagsulay ug hagit nga atong gisagubang niining panahona apan padayon gihapong nagkasiga ang kainit sa pagtuo sa mga parokyano sa St. Mary of the Perpetual Rosary Parish ngadto sa Dios ug sa pagdebosyon sa Mahal nga Birhen. Niining panahon sa kapistahan ang kanunay pag-ampo ilabina sa Santos nga Rosaryo, pagpakita sa kamanggihatagon uban sa kadasig ug kalig-on maoy nahimong panlaban sa mga parokyano taliwala niining mga pagsulay.

Malipayong piyesta sa tanan ug Viva Maria! (Allyza Hope J. Tabigue | SMPRP GKK SoCCom)