Panaghiusa, Balaan, Katoliko

P: Unsaon ang pagtahan sa kaugalingon alang sa paglihok padulong sa kahiusahan sa mga Kristiyano?

T: Ang tinguha sa pagpabalik sa panaghiusa sa tanang mga Kristiyano usa ka gasa gikan ni Cristo ug usa ka tawag sa Espiritu. Kini nga tinguha nagalambigit sa tibuok Simbahan ug makab-ot pinaagi sa pagkakabig sa kasingkasing , pag-ampo, inigsoong pag-inilhanay sa usag usa ug teyolohikanhong pagkulokabildo.

P: Sa unsang paagiha ang Simbahan balaan?

T: Ang Simbahan balaan sanglit ang Labing Balaang Dios mao man ang iyang tigmugna. Gitugyan ni Cristo ang iyang kaugalingon alang kaniya aron sa pagbalaan kaniya ug sa paghimo kaniya nga tinubdan sa kabalaan. Ang Espiritu Santo mihatag sa iyang kinabuhi inubanan sa gugma. Makaplagan diha sa Simbahan ang kapuno sa mga pamaagi sa kaluwasan. Ang pagkabalaan mao ang bokasyon sa matag usa sa  iyang mga sakop ug ang tuyo sa tanan niyang mga kalihokan. Gilakip sa Simbahan, isip iyang ginsakpan si Maria nga Birhen ug ang daghanang mga Santos nga iyang mga sumbanan ug tigpangaliya. Ang pagkabalaan sa Simbahan mao ang tinubdan sa pagsantos sa iyang mga anak kinsa dinhi sa kalibotan miila sa ilang kaugalingon nga mga makasasala nga kanunayng nanginahanglan sa pagkabig ug paghinlo.

P: Ngano man nga ang Simbahan gitawag “Katoliko”?

T: Ang Simbahan katoliko, nga sa ato pa, malukpanon, sanglit si Cristo anaa man kaniya: “Hain gani si Jesucristo, anaa ang Simbahang Katoliko” (San Ignacio sa Antioquia). Nagamantala ang Simbahan sa kapuno ug kinatibuk-an sa pagtoo; siya nagabaton ug nagadumala sa kapuno sa pamaagi sa kaluwasan, gipadala siya ni Cristo sa usa ka misyon ngadto sa tibuok tawhanong kaliwatan.

(Cf. Kompendiyo sa Katekismo sa Simbahang Katoliko, 164-166)