Matinud-anon sa tawag sa Dios

Ika-27 nga Domingo sa Ordinaryong Panahon (October 3, 2021)
Gen. 2:18-24 / Ps 128:1-2, 3, 4-5, 6 / Heb 2:9-11 / Mk 10:2-16 Or Mk 10:2-12

Mga igsoon ania na kita karon sa Ikakawhaag Pito nga Domingo sulod sa Ordinaryong Panahon, ang atong mga pagbasa karon nagpunting sa patulon-an mahitungod sa kaminyoon, kon gitugotan ba nga mahimong makigbulag ang bana human sa kaminyoon? Kini mao ang pangutana sa mga Pariseo ngadto sa atong Ginoong Jesucristo. Pangutana nga adunay tago sa pagtamay, tungod gusto nila nga ang atong Ginoo ilang mabitik pinaagi sa usa ka pangutana, aron sila adunay rason sa pagpatay sa atong Ginoo.

Ang atong unang pagbasa nagpadayag nga “dili maayo nga mag-inusara ang tawo; himoan ko siyag kauban ug katabang nga angay kaniya.” Kini nga kamatuoran nagpadayag nga ang Dios sa sinugdanan pa gayod wala gayod maglaraw nga ang tawo mag-inusara. Ang Dios naghimo gayod ug kauban sa tawo aron mamahimo silang katambayayong sa Dios diha sa kamugnaan.

Dugang pa niana ang atong Ebanghelyo nagsulti usab nga sa sinugdanan ang Dios nagbuhat ug lalaki ug babaye tungod niini ang lalaki mobiya sa iyang amahan ug inahan aron makighiusa sa iyang asawa, kini dayag nga kamatuoran nga gisulti gayod sa atong Ginoong Jesucristo ngadto sa mga tawo nga bout mobulag sa kon unsa ang gihiusa sa Dios ug kini dili gayod bulagon sa tawo.

Kini nga kamatuoran gisulayan sa mga pariseo nga pwede gayod bulagon sa tawo ug gani wala lamang kini nahitabo sa panahon sa atong Ginoong Jesucristo apan karon usab nga panahon, adunay mga tawo nga misulay sa pagguba niining maong kamatuoran. Mga kaigsoonan, ato gayud nga pamalandongan ang gitudlo sa atong Ginoo mahitungod sa kamatuoran sa kaminyoon. Ang kalibutan karon misulay sa pagtudlo susama sa gitudlo sa mga pariseo nga gustong gub-on ang kamatuoran sa kaminyoon aron pagtudlo sa kon unsay gusto sa tawo ug dili ang unsa ang gisugo sa Dios kanato.

Si San Pablo diha sa iyang mga sulat nagpadayag sa kamahinongdanon sa mga managtiayon. Ang bana ug asawa maningkamot sa pagtuman sa kabubut-on sa Dios aron sa maong paagi sa ilang panagtinambayayongay silang duha makakab-ot ngadto sa pagkabalaan nga mao ang hagit kanatong tanan nga mga binunyagan.

Si Jesucristo nga Anak sa Dios mihatag sa iyang kaugalingon nga matinud-anon diha sa Simbahan nga mao ang iyang pangasaw-onon, mao usab kini ang hagit sa mga managtiayon nga mamahimong matinud-anon diha sa ilang kaminyoon. Apan dili lamang kini diha kutob sa mga managtiayon apan kanato nga mga misunod kang Kristo, kita gihagit nga magmatinud-anon diha sa atong tagsa-tagsa ka mga tawag sa kinabuhi.