Hagit sa Pagkamamugnaon sa Ika-2 ka Tuig sa Blended Learning

Dako ang kabalaka karon ang anaa sa akademiya sa nagpadayon nga “blended learning” alang sa tuig tingtungha 2021-2022 taliwala sa pandemiya dala sa coronavirus.

Inay nga minilyon ka mga kabataan ang nagpunsisok sa mga tulunghaan atol sa unang adlaw sa pag-abli sa tuig tingtungha niadtong Septembre 13, 2021, nagpabilin nga anaa sulod sa ilang tagsa-tagsa ka mga panimalay ang mga estudyante sanglit wala pa gisugdan ang pagbakuna sa mga kabataan nga nag-edad 12 anyos kutob 17 anyos.

Gibutyag sa Davao Association of Catholic Schools nga gi-representar ni Fr. Tom Avila (kanhi presidente) atol sa labing ulahing panagtigom sa mga pastoral workers, kaparian, ug kaobispohan sa Davao, Digos Tagum ug Mati (DADITAMA) nga nag-atubang karon ang nasud sa gitawag nga educational crisis tungod sa pag-us-os sa learning proficiency sa kabataan.

Base sa virtual conference sa estado sa edukasyon nga gipahigayon niadtong Hulyo 5, 2021 sa Philippine Business for Education, namatud-an nga 30% sa mga kabataan nga nag-edad ug 1-5 anyos “stunted”; 1 sa upat ka mga bata nga anaa sa kinder wala magtungha; 1 sa 5 ka mga bata nga ubos sa 5 anyos kulang sa timbang; 3 sa 4 ka mga tulunghaan walay internet access; 1.1 milyon ka mga estudyante wala matungha sa milabay nga tuig.

Siya midugang nga 1,179 ka mga pribadong tulunghaan, lakip na ang mga Katoliko nga mga tulunghaan ang nagserado.

Samtang anaa lamang sa 28% sa elementarya ug 37% sa segundariya ang overall average passing rate ug 1 sa 4 ka mga ginikanan nag-ingon nga wala makat-on ang ilang mga anak sa blended learning.

Duna pay mga suliran sa pag-access sa internet ug pag-angkon ug gadget o computer gawas pa sa kakulang sa interes sa kadaghanan sa mga estudyante sa pagtuon sa ilang modules.

Base usab sa mga pagpanubay, namatud-an nga dunay kalisdanan sa pagbasa ang mga estudyante sa Grade 3, samtang gipa-uswag ang grado sa mga Junior high school bisan ug ubos ang ilang nakat-onan: 1% sa matematika; 3% sa English; 1% sa Science; 13% sa Filipino; 10% sa araling panlipunan. Ang Grade 5 nga mga estudyante dunay kubos nga proficiency sa pagbasa sa 10%; pagsulat – 2%; ug matematika 17%.

Namatikdan nga daghan sa mga estudyante ang wala na mobalik sa pagtungha sa mga pribadong tulunghaan ug namalhin ngadto sa pampubliko nga mga tulunghaan sukad sa pagsugod sa pandemiya. Sa datus nga gipakita ni Fr. Avila, mikubos ngadto sa 20% ang enrollment sa mga Katolikong tulunghaan sa DADITAMA gikan tuig tingtungha 2019-2020 kon itandi sa tuig 2020-2021.

Nag-atubang gihapon ang mga Katolikong mga tulunghaan sa mga hagit sa isyu sa internet connectivity, dakong budget alang sa paghimo ug pagprinta sa mga modules, training ug re-tooling sa mga magtutudlo sa online learning, finances, mga suholan, government subsidies, gadgets alang sa online teaching ug learning, ug ang mental health support alang sa mga magtutudlo ug mga estudyante.

Hinoon, kining maong mga isyu gitubag sa Department of Education Davao City School Division Assistant School Division Superintendent Dr. Jinky B. Firman, CESO VI.

Naghimo na matud pa ug mga video ang usa ka team sa mga magtutudlo alang sa creative learning sa mga estudyante nga magamit bisan ug walay internet access kon off-line.

Gigahinan na usab matud pa ug budget ang departamento alang sa pag-apod-apod ug mga tablet nga magamit sa mga estudyante aron nga matan-aw ang maong mga digitized materials.

Kabahin sa mga nakita nga mga sayop sa mga modules, namahayag si Dr. Firman nga duna nay gimugna nga ERROR WATCH nga gilangkuban sa mga pinila nga mga sakop sa dibisyon nga maoy mo-atiman sa mga makita nga mga sayop ug i-correct kini.

Sa Septembre 14, 2021, nakatala pa lamang ug 84% kon 305,060 ka mga estudyante ang nag-enroll na. Gipasabot ni Dr. Firman nga sa ulahing 2 ka tuig, mikabat sa 395,881 ang total enrollees gikan sa publiko ug pribadong mga tulunghaan: pribado – 27,207; publiko – 277,853.

Siya midugang nga padayong modawat ang mga tulunghaan ug mga late enrollees hangtod nga makab-ot ang dili momenos sa 85% sa ilang attendance.

Apan, sa kabahin sa Katolikong simbahan, ang krisis sa Katoliko nga edukasyon lapas pa sa suliran sa affordability o accessibility bisan ug sa makadaghan nga higayon nga nahimo kining mga rason sa pag-menos sa enrollment sa mga Katolikong tulunghaan.

Gipasabot ni Fr. Avila nga ang mas lalom nga hinungdan sa krisis sa edukasyon mao ang tensyon tali sa mithi sa usa ka lig-on nga pormasyon sa Katolikong pagtoo nga mahatag sa Katoliko nga mga tulunghaan ug ang tumong sa pag-agni sa daghang mga estudyante pinaagi sa paghatag ug kalidad nga edukasyon ug professional training nga gilantaw nga maoy mahatag sa mga Katoliko nga mga tulunghaan ug mga unibersidad.

Busa, sugyot ni Fr. Avila nga nagkinahanglan ug suporta ang Katoliko nga mga tulunghaan gikan sa tanang mga wsektor sa komunidad, gobyerno ug mga lideres sa Simbahan; mapadayonon nga mga development programs alang sa mga school administrators, teachers, faculty ug staff ug ang equitable support alang sa tanang mga estudyante ug mga magtutudlko sa publiko ug pribado nga mga tulunghaan.