Kahiusahan ug Panagdait Alang sa Tanan

Ika-26 nga Domingo sa Ordinaryong Panahon (September 26, 2021)
Numbers 11:25-29 / Psalms 19:8, 10, 12-13, 14 / James 5:1-6 / Mark 9:38-43, 45, 47-48

“Kay ang dili batok kanato, dapig kanato” Bisan kinsa nga magbuhat og maayong mga butang sa ngalan ni Jesus ug alang kang Jesus dili gayud angayan nga babagan. Tungod kay ang bisan kinsa nga nagpadayag nga siya alang kang Jesus o uban kang Jesus sa kanunay nagabuhat sa mga maayong butang alang sa tanan. Ang atong pagtuo kang Jesus maoy hinungdan sa atong kahiusahan ug pagtahud sa matag usa. Kini nga pagtuo magwala sa pagka-bulagbulag, kagubot ug walay pagsinabtanay sa usag-usa. Pagka-anindot sination kon ang usa ka katilingban o simbahan o GKK, bisan kon nagkalain lain ug tinuohan ug mga prinsipyo sa kinabuhi magpuyo sa pagsinabtanay, pagtinahuray, pagtinabangay ug uban pa, alang sa kalamboan sa tanan. Kon mao kini ang buhaton sa tawong adunay pagtuo kang Jesus, dili mahitabo ang gisulat ni Santiago sa ikaduhang pagbasa nga mga panghimaraot sa mga nagbuhat ug dautan sa isigkatawo.

Sa pagkatinuod ang ngalan ni Jesus adunay gahom. Si Jesus gamhanan. Siya adunay gahom batok sa yawa. Mabuntog niya ang sala ug sakit. Nagmadaugon siya batok sa kamatayon ug kang Sartanas. Si Jesus hingpit nga makahunong sa tanang puwersa sa kinaiyahan. Walay makapildi kang Jesus. Siya ang labaw sa tanang butang.

Busa tawag kanunay sa iyang ngalan. Pangitaa siya kanunay. Dangop sa iyang mahigugmaong sugyot ug panabang. Ilabi kon kita anaa sa mga pagsulay ug kalisod. Ilabi na kon anaa kita sa kakuyaw ug pagduhaduha. Ilabi na kon kita nagmasakiton ug nag-antus, balik-balika sa atong mga ngabil ang ngalan ni Jesus. Si Jesus mamati kanato kay andam siya sa pag-atiman kanato. Dili gayud siya mohunong sa pagbuhat og maayo alang kanato. Dili gayud kita niya pasagdan.

Ang ikaduha nga mensahe nga atong makutlo ning mga pagbasa, mao ang hagit kanato nga dili unta kita ang mahimong tinubdan sa sala o maghatag ug dili maayong pang-ingnan sa uban. Dili unta kita mahimong hinungdan nga ang atong isigkatawo masayop o mahulog sa sala. Dili nato sila dalhon ngadto sa bung-aw sa empyerno. Andam usab kita nga mobulag niadtong magdala kanato sa dautan ug sala. Atong biyaan ang mga tawo, ang mga lugar o bisan gani ang luna sa pangatungdanan, diin magdala kanato sa kadautan ug sala. Hinaut nga dili gayud kita mobulag kang Jesus aron sa kanunay anaa ang iyang Espiritu uban kanato ug masunod nato ang iyang mga gipanudlo.