Gusto Mo Bang Mahimong Bantogan?

Ika-25 nga Domingo sa Ordinaryong Panahon (September 19, 2021)
Wis. 2:12, 17-20 / Ps 54:3-4, 5, 6-8 / Jas 3:16-4:3 / Mk 9:30-37

Kinsa goy dili buot nga mahimong bantugan o labing dakung tawo sa katilingban? Dili baya dautan ang mangandoy o magdamgo nga mahimong usa niini. Apan unsa man ang matuod nga pagka bantugan ug labing daku? Si Jesus nagsaway sa pagsabot sa mga tinun-an mahitungod nini. Kay ang ilang pagsabot mao nga gahum, ug unsay anaa kanatong mga meteryal nga mga butang, ang pasikaran niining pagka-bantugan o labing daku o pagka-adunay autoridad sa katilingban.

Alang kang Jesus ning atong ebanghelyo karong Domingoha ang pagka-bantugan o labing daku mao ang pag-alagad, nga nagpasabot pag-alagad ngadto sa mga kabus, mga gagmay, mga sinalikway sa katilingban. Ang pag-alagad mao ang paggamit sa atong talento, atong kabatid, kahanas alang sa kaayuhan ug kalamboan sa atong isigkatawo. Mag-alagad kita aron molambo og motubo ang kapasidad sa atong isigkatawo. Ang pagkabantugan mao ang pagbuhat ug mga butang dili alang sa kaugalingon ,hinoon alang sa pagpa-ayo o pag-uswag sa uban, ug dili aron moulipon sa katawhan, mopakunhod sa kagawasan sa isigkatawo. Ang pagka-daku o bantugan mao ang pagkamangihatagon ug dili aron mahimong hakog sa unsay anaa kaniya.

Sama pananglit sa mga bata o mga batan-on. Sila dili makahimo sa mga butang pinaagi sa ilang kaugalingon lamang. Kinahanglan nila ang panabang sa uban. Busa mahimo kitang labing daku kon hatagan nato sila sa pagpasensya, pagsabot ug panabang. Hatagan sila sa tukmang atensyon bisan gani sa ilang paglakaw, pagkaon, pagkatulog ug sa tanang mga buluhaton aron sila motubo ug molambo. Magmapa-sensyahon usab kita niadtong wala manumbaling kanato ug nagpahimulos sa atong kaayo. Tabangan ang mga tawong hinay kaayo sa pagbag-o sa kaugalingon. Dalhon nato ang tanan ngadto sa pag-amping ug kaluwasan. Dalhon nato sila balik sa kinabuhing puno sa grasya, ngadto sa Dios. Mao nga gikuha ni Jesus ang usa ka bata aron mahimong ejemplo sa unsa ang kabantogan ug ka labing daku sa mata sa Dios. Siya ang usa ka gamay ug dili panumbalingon aron mamahimong bantogan ug labing daku. Ang angayan nga ikapakita nato sa katawhan dili ang bangiitang panghunahuna o pangisip kondili ang labing dakung kasingkasing. Kasingkasing nga makahibalong mahigugma, mohatag sa panginahanglan sa katawhan, labaw na ang gugma ngadto sa tanan. Ang atong ika-paambit dili ang dakung kahibalo kondili ang mahigugmaong paghalad nga matinud-anon ngadto sa sa tanan. Ang atong pagkinabuhi dili aron makapanag-iya sa gahom kondili alang sa dakung pagtuo. Sa laing pagkasulti, ang pagkabantugan ug pagka-labing daku mao ang pagpuyo alang kang Cristo ug pagpakamatay uban kang Cristo.