EDSA

Hapit na usab ang anibersaryo sa EDSA People Power. Unsa na kahay kahulugan niini alang sa yanong  Pilipino? Tuguti ako sa pagpaambit  kaninyo sa akong kasinatian.

Puno sa paglaum. Human sa dugay’ng panahon ubos sa rehimeng Martial Law gikan 1972-1986, kanus-a nagpadayon akong nagpaabot sa pagtapos sa maong bahin sa kasaysayan, ang   nga malinawon , maampoon ug masaligon sa Dios, ug matinabangon, naghatag ug bag-ong kahayag human sa kadulum. Ang bag-ong sanag sa adlaw nisidlak alang sa tibuok kapupud-an. Murag  ang tunok sa dughan, naibot ug naghatag sa higayon sa pag-ayo sa dakong samad. Salamat sa Dios. Salamat sa Mahal nga Birheng Maria nga kauban nato sa panaw sa pag-alsa nga maluwasnon.

Bag-ong pamunoan, bag-ong batakang balaod. Gisundan ang EDSA People Power sa pag-puli sa kasaligang pamunoan nga dili sama sa mga nangaging namunoan. Ang Batakang Balaod gi-usab ug gi-dawat sa kadaghanan nga maoy maggiya sa nasud padulong sa kaangayan, kalinaw, ug kaugmaran alang sa tanan.

Ang Piniliay sa 1987. Tungod sa Martial Law, wala ko miapil sa mga piniliay kay nasayod ako nga walay kahulugan ang maong mga piniliay ubos sa gahom sa Diktadura. Ang una nakong pagapil sa piniliay niadtong 1987 lamang – Congressional  Elections. Lipay kaayo ko. Apan sa kampanya pa lamang, nakita na ang pagkabanhaw sa naandang  politika sa Pilipinas diin ang mga tradisyonal nga politiko  gikan gihapon sa mao rang pamilya ang nanagan. Resulta? Balik ang mga daang politiko sa Kongreso. Sa Local election sa 1988 ug Barangay election sa 1989. Nisamot ang akong kadismaya. Dili diay sayon ang pagbag-o sa nasud kon ang mga tawo mismo mao ra gihapon ang kinaiya.

Nasakripisyo ang kahiusahan sa tumong. Ang nagkahiusang katawhan sa EDSA hinay-hinay nagkatibulaag ug nagpatigbabaw og balik ang sektoral nga interes, diin ang mga gamhanan, sapian ug dungganan ang naghari sa bahandi sa nasud samtang ang kadaghanan nagpadayon nga naglunang sa lapok sa kawad-on ug kakulangan maayo ug mauswagong kinabuhi.  Ang kagawasan ug kalinaw nga gimithi naghinayhinay nga napadaplin. Nagkanya-kanya lang gihapon. Ug ang mga pinakaubos ug pinakahuyang, ug pinakakabus labing naalaot.

Niusbaw ang Kurakot ug pag-usik sa bahandi. Abi nako nakat-on na kita sa kasinatian sa panahon sa Martial Law. Ang pagpasulabi sa mga gamhanan, sapian ug dungganan. Wala pa diay. Nahawod naman hinuon kita sa pagtago, palusot, pamasangil, panabon, pangambot bahin sa mga kadautan nga nagakahitabo sa lokal ug nasyonal nga kahimtang. Plunder diri, plunder didto. Mahurot na lamang ang kusog sa paggukod sa mga kriminal. Pagkatapos, makalusot pa gihapon.

Samtang ang bagang hut-ong sa mga tawo nag-antos sa kawad-on, ang mga namunoan nagpasulabi sa paggasto ug pangutang alang sa walay pulos nga mga butang.

Ang mga binhi sa paglaum. Taliwala niining kasaysayan sa kapakyasan, wala pa gihapon napalong ang siga sa EDSA. Naa pa gihapon nagpabilin nga mga yanong mga lungsuranon sa lainlaing sektor nga nagpadayon nga makigbisog alang sa kaangayan, kalinaw ug kaugmaran sa tanan. Ang mga relihiyosong sector sama sa atong Simbahang Katoliko wala niundang sa pagdapit ug paghagit sa katawhan ngadto sa pagbag-o gikan sa kadulom sa kanya-kanya ngadto sa maangayong panaglambigitay. Gikan sa kahakog ngadto sa pagtinahuray ug paghinigugmaay. Gikan sa panagbingkil ngadto sa panagdait. Gikan sa katapolan ngadto sa kakugi ug kaigmat alang sa kaayuhan sa tanan.

Ang EDSA nagpadayon karon. Gitawag ang tanan sa kasantos, sa katarong sa Dios.  Ug gipadala kita nga mga Bayani alang sa pagkab-ot sa kalamposan sa atong gimithi nga kaangayan kalinaw ug kaugmaran. Alang kanatong mga Kristiyano – siya ang atong Dalan, Kamatuoran, ug Kinabuhi. Walay laing dalan. Walay laing paaagi. Kini maoy atong gitanyag ug gisaksihan ngadto sa kalibutan nga nagsalig lamang sa iyang gahum, bahandi ug dungog. Apan napakyas lang gihapon. Ang EDSA nagapadayon sa mga gamay, sa mga kabus, sa mga nakalimtan, apan nagmatinud-anon,  puno sa pagtoo ug paglaum sa Dios. Nagmaisogong nakigbisog  atubangan sa mga hulga, ug hagit sa kahimtang karon. (jimmg48@gmail.com)