2nd GKK festival sa San Lorenzo Ruiz Parish, Gisaulog

Madasigon nga  gisaulog sa San Lorenzo Ruiz Parish ang ilang ikaduha nga GKK Festival niadtong Pebrero 15 hangtod Pebrero 16 ning tuiga, subay  kini sa  ika 30th founding anniversary sa maong parokya.

Sa unang adlaw sa maong festival, nagpahigayon og misa sa alas sais sa buntag ug gisundan kini og motorcade sa alas otso sa buntag.

Apil sa maong motorcade ang Top 10 Little Miss San Lorenzo nga gikan sa mga nagkalainlaing GKK nga sakop sa maong parokya inubanan sa ilang mga ginikanan.

Ang mga GKK council, leaders ug members nagpasiugda og flag raising ug market-market activity human sa motorcade.

Adunay duha ka mga dagko nga events ang maong festival, mao kini ang Little Miss San Lorenzo ug ang Field Demo nga gisalmotan sa dise syete ka mga representanteng grupo gikan sa mga managlahing Christian communities duol sa maong parokya.

Midaug sa Little Miss San Lorenzo si Rona Glyz Fortinez nga taga San Lorenzo Ruiz, San Lorenzo Village samtang nagmadaugon sab ang San Lorenzo Ruiz Christian Community, San Lorenzo Village sa ilang field demonstration.

Malipayon nga midawat ang mga midaug sa ilang mga premyo.

Sa ikaduhang adlaw sa festival, adunay gipahigayon nga fellowship alas onse sa buntag diin tanan myembro sa parokya ilang giimbitahan.

Ang tumong sa maong katikaran bout mahiusa ug mas magkailhanay ang tanang katawhan nga sakop sa San Lorenzo Ruiz Parish sa Talomo.

Ang duha kaadlaw nga GKK festival dunay tema nga “Madasigon ug malipayong mga Layko nga nangalagad sa Simbahan”.