Mga Mata Nga Way Pagbasol

“Gusto ko maka-alagad sa Ginoo ug maka inspired og tawo.” Mao kini ang makadasig nga pulong sa usa ka buta apan puno sa kadasig nga batan-on nga si Alferny Troy V. Torres.

Si Troy, 21 anyos, natawo nga buta apan naghatag og kahayag sa kadaghanan pinaagi sa iyang talento ug pagpangalagad. Tres (3) anyos pa lamang si Troy, namatikdan na siya sa iyang Lolo nga aduna siyay kapasidad sa paggamit og drums. Dili musician ang iyang Lolo, apan hilig og musika ang side sa iyang mama. Giregalohan siya sa iyang Lolo og drums. Sa sugod, malingaw lang si Troy sa pagpaminaw sa mga tugtog nga iyang madungan, hangtod nga ginasundog na niya kini. Apan ang iyang talento sa drums wala niya na hasa og maayo tungod kay naa siyay Mild Cerebral Palsy (A group of disorders that affect movement, muscle tone, balance, and posture). Kini ang naghatod kang Troy nga moagi og series of operations.

Dihang nag edad si Troy og syete (7) anyos, nadiskubrihan nga aduna usab siyay kapasidad nga magtugtog ginamit ang keyboard. Sugod niining tungora, nag-focus na si Troy sa keyboard diin dili siya maglisod sama sa pagamit sa drums. Gikuhaan pud si Troy sa iyang pamilya og Home Teacher kinsa maoy nagtudlo kaniya sa finger placements ug sa mga basic chords sa keyboard.

Nagskwela si Troy sa SPED (Special Education) hangtod Grade 4. Sa iyang pag-Grade 5, mibalhin siya sa Davao School for the Blind. Sa iyang pagbalhin, dili dihadiha dayon nadiskubrihan ang iyang talento sa pagtugtog. Nagabansay si Troy sa paggamit og Trombone, apan nahibaloan sa ilang maestro nga makabalo diay siyang mag-keyboard. Nadiskubre lang kini sa tunga-tunga sa tuig 2013 – sa dihang nagbuo ang Davao School for the Blind og One Light Orchestra nga grupo. Niining maong grupo, si Troy ang una ug nag-inusarang nagagamit og Electronic Instrument (keyboard). Tuig 2015, gi-imbitahan ang maong grupo ngadto sa Germany. Apan sa wala pa milarga ang maong grupo, giingnan ni Troy ang iyang ginikanan nga gusto siyang moalagad sa Ginoo. Ug tuod man, pagbalik nila gikan sa Germany, giduol sa mama ni Troy ang Music Ministry sa San Pablo Parish, sa katuyoan nga gusto ni Troy nga mangalagad.

Sa pagsugod ni Troy sa pagpangalagad, daghan usab siyag mga kaagi nga daw makapaluya kaniya. Adunay mga hungihong nga bata pa siya, wala pa kaayoy kaagi sa pagtugtog ug dili makakita kon musinyas ang pari. Apan imbis makapaluya kini kaniya, gihimo kini ni Troy nga motivation aron ipadayag ang iyang talento diha sa pagpangalagad bisan tuod dili siya makakita. “Ang naa kanunay sa akong hunahuna, dili man sila ang akong alagaran, ang Ginoo man”, mao kini ang gihuptan ni Troy nga pundasyon sa iyang pagsugod sa pagpangalagad.

Sa dihang gipatugtog si Troy, nakitaan nga aduna gyud siyay kapasidad sa pagtugtog. Sa sinugdan, on call lang si Troy sa Simbahan, hangtod nga gihatagan na siya og slot. “Kulba kaayo sa sugod, kay naa ko sa dako nga Simbahan, nya labi na nga naa koy namali”, matod pa ni Troy. Apan nadasig usab si Troy og maayo dihang adunay mga tawo nga mudol kaniya, magpasalamat kay nakapamalandong gyud daw sila panahon sa Misa tungod sa mga tugtog ni Troy. “Maka-overwhelmed ug nisamot ang akong willingness nga mangalagad”, malipayong saysay ni Troy.

Sa sugod, si Troy palang isa ang nanglagad nga usa ka buta, apan sa ngadto-ngadto, nadala na usab niya ang pipila sa iyang mga kaubanan gikan sa ilang skwelahan. “Akong gi-imbita ang akong mga kauban, labi na katong akong mga close friends, nga mag-serve mi sa Simbahan, ug positive usab ang ilang tubag hangtod nga nakahimo mi’g grupo, kaming mga blind”, saysay ni Troy.

Unom katuig na si Troy sa iyang malipayong pagpanglagad. Nagahimo siya’g melody ug naga-arrange sa tono ug nota sa musika. “Gikan pa sa sugod, ang akong goal jud, maka-alagad sa Ginoo, ma-share nako akong talento, maka-inspired sa mga tawo, ug malagpasan ang mga problema”, matod pa ni Troy. Alang kang Troy, ang tanan niyang talento grasya nga gikan sa Ginoo, maong malipayon usab niya kining ibalik og halad sa Ginoo pinaagi sa pagpangalagad. Ang gasa ni Troy sa musika, madasigon niya kining gipalambo ug gipatubo uban usab sa iyang masuportahon nga pamilya ug mga higala. Uban sa lig-ong pagtuo, si Troy nagkanayon, “Wala ko nagmahay nga ako usa ka buta, kay gigasahan man ko sa Ginoo og talento. Ug ang akong depekto, dili babag sa akong pag-alagad sa Ginoo.” (Bro. Junel Bustamante)