Pinangayong Kapikas sa Kinabuhi

“Reflect seriously what you desire to do. Above all, pray much that our dear Lord may make known to you what He wishes you to do.” – St. Theodore Guerin

Lisud ang pagpangandam sa umaabot nga kasal apan ang pagpangandam niini sulod niining panahon sa pandemya maoy nakadungag sa kalisdanan. Si Judy Ann Bangalao ug ang iyang pamanhunon nga si Felix Blando Tura nakasinati usab niining maong kalisud ilabina sa ilang gihimong pagplano sa ilang kasal karong tuiga.

Kaniadto, wala sa huna-huna ni Judy Ann ang kaminyoon. Gusto niyang mahimong madre sukad pa niadtong Grade 5 pa siya. Gusto niyang mahimong usa ka relihiyosa human niya makaila ang usa ka Carmelite Nun nga mipuyo sa ilang gipuy-ang subdivision. Human mahimong suod sa mga madre sa Carmelite, hinay-hinay niyang nakita ang kaanindot sa ilang mga misyon. Ang kasinatian sa pag-ila kang Santa Teresita ug ilabina sa Ginoong Hesukristo nahimong dakung bahin sa iyang pangandoy nga mamahimong usa ka madre. Gikan hayskul hangtod kolehiyo, kung pangutan-on siya kung unsa ang iyang pilion nga trabaho ang iyang tubag mao ang: “Gusto ko mahimong madre.”

“Na! Kahasul ana oy. Wala kay liwat ana. Dili ka malipay ana.” Mao kini ang pipila ka mga nahimong komento sa iyang mga kaila, higala ug paryente. Usa siya ka education graduate ug nangandoy na siyang moapil sa mga search-in, apan wala mitugot ang iyang inahan. Tungod niini, nangayo og tabang si Ann sa Ginoo pinaagi sa pag-ampo niining mga pulonga: “Lord, kung dili para sa akoa kining bokasyona, hinaot tabangan ko nimo nga makita ang imong plano para kanako.”

Bisan tuod wala siya nagmalampuson sa mga search-in niadtong tuig 2017 ug 2018, iyang gihalad iyang kinabuhi sa Ginoo ug padayong naga-ampo sa iyang bokasyon ug pagpanudlo. Dili man siya usa ka madre, apan iyang gihalad ang iyang kaugalingon sa Ginoo pinaagi sa pagbisita sa Carmelite Monastery matag Miyerkules gikan sa trabaho ug pag-adto sa Our Mother of Perpetual Help Parish matag Biyernes. Gihimo niya kini sa tago gikan 2016 hangtod 2018. Sulod niining mga tuiga iyang nakita nga padayon siyang gina-ampo sa iyang inahan nga unta ablihan niya ang iyang kasingkasing sa usa ka lalaki. Kini ang padayong gina-ampo sa iyang mama tungod kay wala pa nahitabo nga giablihan ni Ann ang iyang kaugalingon sa mga lalaking buot manguyab sa iyaha.

“Lord if I am not fit to become a nun, then please allow me to find a partner just like St. Joseph. It is not my desire to commit into relationship, but I believe that nothing is impossible for everything is possible.” Mao kini ang gi-ampo ni Ann sa Ginoo. Sumala pa niya, gusto niyang makakita og lalaki nga nagabaton sa mga hiyas ni San Jose ug mga hiyas usab sa iyang amahan.

Kaniadtong Hunyo 3, 2018, giimbita siya sa iyang higala sa pagtambong sa usa ka Latin Mass, ug nagdesisyon siyang mutambong niini. Didto niya nakaila si Felix ug human sa maong Misa nagsugod na kining mo-chat sa iyaha sa Messenger bisan dili pa sila suod sa usa’g usa. Hangtod nga mas nagkaila sila sa usa ka ‘friendly date’ ug sulod sa duha ka bulan, giingon ni Felix na gusto niyang panguyaban si Ann. Sulod sa duha ka bulan, ginaubanan si Ann ni Felix sa pag-adto sa parokya sa OMPH samtang kini nagapaguyab kaniya. “I really prayed for a Joseph, a guy who can offer his sincerity, pure love, humbleness and of course has a deep love for Mother Mary. I will not enter into a relationship if I am not ready since I don’t want to hurt someone. Also, I have a desire to enter into a religious life so hopefully you will respect me for it,” mao kini giingon ni Ann sa wala pa niya gihatag ang iyahang matam-is nga “Oo” ngadto kang Felix kinsa maoy una niyang boyfriend.

Sama sa ubang mga relasyon, dili perpekto ang ilang panag-uban – adunay mga panahon sa kalipay ug kasubo – apan ilahang ginasiguro nga ilaha kining masulbad. Ang ilang panag-uban gisuportahan usab sa ilang mga pamilya. Nahimo na usab nilang tradisyon nga mag-ampo sa Santos nga Rosaryo matag buntag ug mag-ampo sa dili pa matulog. Sumala pa ni Ann, nga si Felix ang lalaki nga permaminting ginapakita ug ginapabati ngadto kaniya ang iyang dakong pagmahal. Sulod usab sa ilang panag-uban, ginatugotan siya ni Felix nga mag-search-in sa lain-laing mga kongregasyon.

Dako kaayo ang kalipay ni Ann tungod kay gidungog sa Ginoo ang iyang pag-ampo nga makakita siyag lalaki nga nagbaton sa mga hiyas ni Senyor San Jose. Nakita niya ang pagkapasensyoso, pagkabuotan, pagkamatinahuron pagkamaamomahon ug pagkamaayong tigpamaminaw kang Felix. Makita usab kang Felix ang pinakadakong hiyas ni San Jose nga mao ang pagkaputli. Dako ang respeto ni Felix sa pagkababaye ni Ann ug andam siyang mohulat sa taknang panahon.

Human ang duha ka tuig ug usa ka bulan sa ilang panag-uban, nagdesisyon si Felix nga pangayoon ang kamot ni Ann alang sa kaminyoon kaniadtong Septiyembre 26, 2019. “Based on the Catholic Faith, two years is enough for a man and woman to decide whether to continue the relationship or not,” mao kini ang mga gipamulong ni Felix kang Ann. Kini usab gikonsulta ni Ann sa iyang mga ginikanan ug ubang mga higala ilabina kay sayod siya nga importante kining butanga.

Sa pagkakaron, ang hagit sa ilang pagpangandam mao ang kadaghanon sa katawhan nga pwedeng motambong sa kasal lakip na ang ilang nagkalain-laing bakanteng oras tungod kay si Felix nagtrabaho sa field work ug work-from-home si Ann. Ang limitadong oras usab nga gigahin sa gobyerno nakaapekto usab sa ilang mga gihimong mga proseso sa kasal.

Gitapos ni Ann ang ilang istorya pinaagi sa pag-ingon niining mga pulonga. “I am very open to God especially about our plans for the future. By His grace, I was able to meet a man just like Jesus’s foster father, St. Joseph.” (Allyza Hope Tabigue | GKK SocCom of St. Mary of the Perpetual Rosary Parish)