Pamilya Giharos sa Pandemya

[Kining maong sugilanon gikan sa matuod nga kasinatian sa tibuok pamilya nga nagpositbo sa Covid-19. Ang wala pagbutyag sa mga pangalan, gituyo aron mapanalipdan ang katungod ug dignidad sa mga hingtungdan.]

“Pagkadawat nako sa call sa akong son-in-law nga na positive siya, ug nabalaka siya sa amua sa akong bana nga mibisita mi sa ilaha, pirte nakong kulbaa.” Mao kini ang gisaysay sa usa ka inahan kinsa nabalaka ug nakuyawan sa iyang nasayran. Siya ug ang iyang bana mao ang close contact sa iyang anak nga babaye, son-in-law ug duha ka mga apo nga tanan nagpositibo sa Covid-19. Giingnan sila sa ilang mga anak nga magpa-swab. Pagawas sa resulta, silang tanan, apil ang ilang kamanghuran nga anak ug ang yaya sa ilang apo, nagpositibo usab sa Covid-19.

Silang tanan gidala sa quarantine facility, pero sa lainlaing mga lugar. “Grabe ang akong gibati atong panahuna, emotionally depressed jud kaayo ko isip usa ka inahan nga kami tanan positibo. Pati pa ang akong anak nga tua sa laing nasud naa pud sa quarantine facility atong tungora uban gihapon sa iyang asawa ug ilang duha ka anak nga 8 years old ug 10 months old.” Mao kini gisaysay sa inahan kinsa tulo ka adlaw walay gana mokaon samtang naa sila didto sa quarantine facility. “Sige kog hilak kay gilaliman ka, pati intawn ang akong apo na apil,” dungag pa sa inahan.

Pero dako ang pasalamat sa inahan tungod kay wala jud siya mihunong og sangpit sa Ginoo. Siya nagkanayon, “Ako jung gitugyan sa Ginoo ang tanan kay kabalo ko nga di gyud mi Niya pasagdan. Ug salamat sa Dios kay mild or asymptomatic mi tanan.”

Nagpasalamat og dako ang inahan nga malampuson nilang nalabang ang maong dakong pagsulay sa ilang kinabuhi. Siya mapasalamaton sa Ginoo nga sa katapusan, luwas silang tanan nga nakauli sa ilang mga panimalay. Nagpasalamat siya sa Ginoo sa iyang pamilya nga wala gayod mibiya kanila panahon sa kalisdanan, ilabi na ang iyang 87 anyos nga inahan nga walay puas nga miluhod sa pag-ampo kanila sukad pa sa sinugdanan. Nagpasalamat usab siya sa iyang mga kauban sa trabaho, mga classmates, mga silingan ug mga higala kinsa mitabang ug miampo kanila samtang sila anaa sa kaluya. Sa iyang kamapasalamaton, siya nagkanayon, “Life is precious, life is beautiful. God heals and never leaves.” (Bro. Junel Bustamante)

(Si Bro. Junel Bustamante usa ka seminarista sa Arkidayosis sa Davao. Nahuman niya ang kursong Pilosopiya sa St. Francis Xavier College Seminary ug Teolohiya sa Regional Major Seminary of Mindanao Inc. Kasamtangan siyang nadistino sa Archdiocesan Social Communication diin kabahin sa iyang programa isip pre-deacon sa Arkidayosis,)