Ang kadaugan sa Kaluoy

Ika-16 nga Domingo sa Ordinaryong Panahon (July 18, 2021)
Jer 23:1-6 / Ps 23:1-3, 3-4, 5, 6 / Eph 2:13-18 / Mk 6:30-34

Unsa man gayud ang tiunay nga pagpangalagad? Sa atong unang pagbasa karon, gisaysay ang dili tukmang pagpangalagad. Ang dili tukmang pagpangalagad, mao ang pagpasagad nga ang katawhan mahilayo sa Dios ug mosimba sa nagkalain-laing Dios. Inay nga tultolan sila sa matarung nga dalan ug tudloan sa pagsunod sa Balaang Kasabutan ang pangulo na hinoon ang nagpasiuna sa pagsupak sa kabubut-on sa Dios.

Busa diha sa atong ebanghelyo gipakita ni Jesus ang panig-ingnan isip pangulo. Una sa tanan, ang usa ka pangulo adunay limitasyon sama nga kini kapuyon ug gutomon ug busa adunay panginahanglan ug panahon alang sa kaugalingon. Kay Nakita ni Jesus nga gikapoy ang iyang mga tinun-an, iya silang gipapahulay sa pag-ingon: “Mangadto kita sa dapit nga awaaw aron makapahulay kamog diyutay”. Bililhon ang kinabuhi busa angay kining ampingan. Ang pagka-amgo nga kita tawo, adunay panginahanglan ug limitasyon. Pinaagi sa pagpahulay, mabantayan ang posibleng mabuhat nga kasaypanan diha sa pagpangalagad. Tungod kay usahay mamiligro ang mga desisyon ug ang relasyon sa uban, kon walay pagpamalandong ang usa ka pangulo.

Sa ikaduhang bahin, dili usab kalimtan sa usa ka pangulo nga kon makita niya ang dakung panginahanglan sa iyang katawhan, gamiton niya ang usa ka gasa gikan sa Dios nga nagsilbing gahom ug kusog luyo sa kahuyang, ug kini mao ang kaluoy. Kini mao ang mag-abli sa mga mata aron makita ang hilabihang pag-antos sa uban. Ang kaluoy ang mag-abli sa kasingkasing aron mosabot sa mga panginahanglan ug mga kahuyang sa mga gialagaran. Mahitabo lamang ang tinud-anay nga pagsabot sa kahimtang sa uban ilabina diha sa kahimtang sa kalisod ug kagubot kong mopatigbabaw ang kaluoy, dili ang tawhanong pagbati susama sa kalagot ug kapungot.

Ang gibuhat ni Jesus mao ang pag-hiusa sa duha ka hut-ong sa katawhan. Ang panginahanglan sa katawhan ug ang panginahanglan sa mga tinun-an. Apan kon kita pangulo, o magbalantay, ipatigbabaw gayud ang kaluoy , diin unahon ang panginahanglan sa katawhan kaysa iyang kaugalingon. Dinhi masulod kanang giingon natong Self-denial, o pagsalikway sa kaugalingon alang sa kaayuhan sa uban nga gialagaran.