Kristiyano Nga Dili Katoliko

P: Ngano nga ang Simbahan usa?

T: Ang Simbahan usa tungod kay ang panaghiusa sa Trinidad sa mga Persona diha sa usa ka Dios maoy iyang tinubdan ug sumbanan. Isip iyang Magtutukod ug Ulo, si Jesucristo mitukod pag-usab sa panaghiusa sa tanang katawhan diha sa usa ka lawas. Isip iyang kalag, ang Espiritu Santo nagahiusa sa tanang matuohon diha sa pagkahiusa uban ni Cristo. Ang Simbahan adunay usa lamang ka pagtoo, usa ka sakramentohanong kinabuhi, usa ka apostolikanhong kutay, usa ka paglaom sa kadaghanan, ug usa ug mao ra nga gugma.

P: Asa man nagabarog ang Simbahan ni Cristo nga usa ra?

T: Ang usa ka Simbahan ni Cristo, isip katilingban nga gitukod ug gihan-ay dinhi sa kalibotan, nagabarog (subsistit in) diha sa Katolikong Simbahan, nga gidumala sa Sumusunod ni Pedro ug sa mga Obispo nga nahiusa uban kaniya. Pinaagi lang niining maong Simbahana nga makabaton ang usa og kahingpitan sa mga pamaagi sa kaluwasan sanglit ang Ginoo mitugyan man sa tanang panalangin sa Bag-ong Kasabotan ngadto sa apostolikanhong hut-ong lamang, kansang Pangulo si Pedro.

P: Unsaon pagsabot ang mga Kristiyano nga dili Katoliko?

T: Diha sa mga simbahan ug mga simbahanong katilingban nga nahimulag sa hingpit nga pagkahiusa uban sa Simbahanong Katoliko, daghang mga elemento sa pagbalaan ug kamatuoran ang makaplagan. Kining tanang mga panalangin nagagikan kang Cristo ug nagahatod ngadto sa Katolikanhong panaghiusa. Ang mga sakop niining mga simbahana ug mga katilingbana nangahimong kabahin ni Cristo pinaagi sa Bunyag ug busa ato silang giila isip mga igsoon.

(Cf. Kompendiyo sa Katekismo sa Simbahang Katoliko, 161-163)