KNOT: Danny

Dear KNOT,

Ang akong kinabuhi isip usa ka pamilyadong tao, makaingon ko nga colorful. Dili tungod kay haruhay puno sa kalipay apan kabaliktaran niining tanan. 15 ka tuig na nga minyo. 3 ang among anak ug puro babae. 14, 13, ug 4 anyos.

Ang akong trabaho anaa sa pribado nga kumpanya ug dunay mga sideline kay naa sab ko sa events industry. Ang akong asawa online virtual assistant pud siya. Kanya-kanya kaming paningkamot aron dunay ika sustinir.

Kaniadto malipayon ang among panag-uban apan sa nagkadugay murag lahi na ang dagan. Careful kaayo ko sa akong mga lihok kay tungod gamayng sayop, magyaw-yaw dayun ang akong asawa. Iya dayun akong singkahan nga murag dako jud kaayo ang akong mali nga nabuhat. Pamalikas nga mura jud ug unsang sala nga akong nahimo. Bisan sakit paminawun akoa na lang antuson.

Dili nako batasan Dear KNOT ang mubalos ug yaw-yaw kay kabalo ko kung asa ko mo-lugar, ilabi na nga anaa ang akong mga anak saksi sa mga panghitabo ug ngil-ad nga ilang makita kung kami naga sumpaki. Pipila pa ka mga higayun nga dunay mga panghitabo nga dili angay apan dili ko na lang idetalye pa. Mga senaryo nga common sa managti-ayon ang pagbangi. Akoa na lang ipalapos sa pikas dunggan bisan tuod sakit sa akong kabahin ug matandog ang garbo.

Usa siguro sa mga rason nga dili ko ka-ako ug tubay sa iyang pagpamalikas ug pagyaw-yaw kay tungod anaa ako sa ilahang puder, ilang panimalay. Dear KNOT ako mo-admitar nga naa pud koy pagkulang kay tungod sa among sitwasyon nga wala pa mi sarili nga balay. Hinuon dunay luna/lote nga ginabayaran apan taas-taas pa nga panahon ang paabuton. Lisud sa pagka karon kay tungod sa pandemic hinay ang ekonomiya ug dili pa makalihok kay limitado.

Dakong tabang na unta ug walay pandemic kay medyo okay ang abot sa mga events apan nahunong kini. Dear KNOT wala pay kasayuran kung kanus-a mubalik sa normal ang tanan aron mubalik na pud sa normal ang dagan sa among pamilya. Ang ako lang nga unta taga-an pa ko ug dugang kusog sa pagpailob sa atong Dios Amahan. Nasayud ako nga kini usa lamang sa daghan pang mga umaabot nga pagsulay.

Daghang salamat,
Danny

P.S. Ang tawo samtang buhi, dunay mga kakuli-an sa kinabuhi. Lisod ang pagsunod sa mga lakang ni Kristong Hesus, apan kung imo kining mahimo sayun ra ang pag-atubang aron sulbaron ang mga problema.