KNOT: Jayson

Dear KNOT,

Ang kalinaw maana kanatong tanan mga igsoon ko diha ni Kristo.

Ako si Jayson. Happily married. Wala pa akoy anak tungod bagohay pa lang sa kinabuhing minyo. Hinuon dako akong pagsalig sa atong labawng makagagahum nga itugot kini niya sa husto ug saktong panahon ug oras. Sa kasamtangan gina enjoy una namo magtiayon ang among mga estado inubanan sa pagpangandam sa umaabot.

Dili halayo ang pangidaron nako sa akong asawa. 32 ko ug 28 siya. Duha ka tuig pa kami isip mag-asawa Dear KNOT. Duna pa daw kami latason nga mga unos sa kinabuhing minyo. Mga pagsulay nga dili kalikayan muabotay. Mga suliran usahay nga lisod pagasulbaron. Pipila lamang kuno kini nga mga angayng pangandaman kay anaa pa kami sa stage nga pag-ilhanay.

Tinuod Dear KNOT kay bisan gani sa among estado nga manag uyab pa lang duna na gani mga pagsulay. Dunay mga prinsipyo nga taliwas sa among pagka tawo. Mga tinood nga pamatasan inig anaa sa sitwasyon ayha na mugawas. Amo na kining naagian Dear KNOT mao nga kampante ako nga sulod sa among ka-minyoon mga pipila na lang siguro ang angay namong bantayan. Duna na kami mga pamaagi unsaun pagmaneho sa lubak nga dalan.

Kana lang kung unsay dangatan sa higayon nga duna na kami anak o mga anak nga dapat alagaan. Lahi kuno kung duna na laing miyembro sa pamilya madungag. Daghan na ang mga dapat ikunsidera.

Unsa man kining mga angayng ikunsidera nga aron makapangandam ug dili na makuratan kon ugaling kini among dangatan.

Daghang Salamat,
Jayson

P.S. Matag usa kanato adunay nagkalain-lain ug kinaiya, pamatasan, personalidad. Mugna kita sa Dios Amahan in a unique way, apan taliwala niini kita binuhat sama kaniya in the form of His image and likeness.