GKK Flores de Mayo culmination gisaulog

Usa ka tinuig nga selebrasyon ug debosyon sa mga Katoliko ngadto sa atong Mahal nga Inahan nga si Birhen Maria niining bulan sa Mayo, mao kini ang ginatawag nga Flores de Mayo (Flowers of May).

Ang GKK San Isidro Labrador, Ciudad de Esperanza nga sakop sa St. Mary of the Perpetual Rosary Parish, Buhangin nagsaulog sa Flores de Mayo Culmination niadtong May 31, 2021 sa alas seis ang takna sa hapon diin gipahigayon sa kapilya.

Ang GKK Servant Leaders nagkahiusa nga himuon kini sa mas simple nga pamaagi ug walay partisipasyon sa mga bata tungod sa pagsunod sa mga health protocols nga gipatuman sa gobyerno.

Gisugdan kini pinaagi sa pag-ampo ni Sis. Maria Dexie Calvo. Sa pagpadayon adunay gihimo nga hamubo nga katekesis nga gipaambit ni Brod Josenit “Jet” Garcia, GKK PSP/formator. Iyang gipasabot ngadto sa nanambong ang mahitungod sa papel ni Santa Maria isip atong Langitnong Inahan (Mariology). He gave emphasis on the Hail Mary Prayer (Hail, Full of Grace, The Lord is with you, Blessed, Fiat, Battle). Dako kaayo ang pasalamat sa mga GSL ug miyembro nga nanambong tungod kay mas napalawom ang nakat-onan sa matag-usa kung unsa ka importante sa atong kinabuhi si Birhen Maria nga maoy intercessor sa atong mga pag-ampo ngadto sa iyang bugtong anak nga si Hesus.

Gisunod dayon ang pag-ampo sa Santos nga Rosaryo nga gipangulohan nila Maria Dexie Calvo, Bella Almonte ug Jet Garcia. Adunay pag prosesyon sa AVE MARIA nga gihatod sa mga selected Young Isidoreans ug paghalad og mga pag-ampo pinaagi usab ngadto kanila sa matag misteryo sa Santos nga Rosaryo.

Makahuluganon ang maong kalihukan tungod kay mao kini ang unang higayon dinhi sa kapilya nga walay presensya sa mga bata ilabina sa mga kanta ug paghalad og mga bulak sa atong Mahal nga Inahan. Bisan pa nga walay presensya sa mga bata gikanta gihapon ang Immaculate Mother, Trece sa Mayo, O Maria Reyna sa Pilipinas ug Adios Reyna sa Langit.

Puno sa gugma ug grasya ang nasinati sa matag-usa niadtong culmination sa Flores de Mayo. Nagmalampuson kini nga gisaulog ug nabati ang kahiusahan sa mga miyembro niining katilingban.

Ang mga pag-ampo ug pangaliya sa katilingban nga mahunong na kining COVID-19 ug pinaagi ni Santa Maria iya kining ipadangat ngadto sa iyang bugtong anak nga si Hesus.

Viva Maria! Viva Hesus! (Arsenia Barimbao, PSK)