“I-ampo ang kaparian” – Bp. Afable

Ang kaparian, isip mga pastor sa daghang mga sumusunod ni Kristo nagkinahanglan sa pag-ampo sa katawhan taliwala sa daghang mga hagit sa modernong panahon.

“I-ampo ang kaparian,” mao kini awhag sa Obispo sa Dayosis sa Digos, Most Rev. Guillermo V. Afable, D.D., atol sa programang Tingog sa Magbalantay sa DXGN 89.9 Spirit FM, adlawng Domingo, Hunyo 13, 2021.

Gipasabot ni Bishop Afable nga dako ang mamahimong epekto ngadto sa Kristohanong Katilingban kung dunay mga kalapasan nga mahimo ang usa ka pari ilabi na nga gihuptan karon sa Katolikong Simbahan ang prinsipyo sa transparency kon gipadayag ngadto sa publiko ang kalihukan ug katikaran sa simbahan.

Kalabot kini sa bag-o pa lamang gisaulog nga World Day of Prayer for the Sanctification of Priests niadtong Hunyo 11, 2021.

Gipasiugdahan ang maong kasaulogan ni anhing Santo Papa Juan Pablo Dos sa 2002 ug gisaulog matag tuig atol sa Solemnidad sa Sagrado Corazon de Jesus.

“Niadtong higayona, atol sa pagsugod sa 3rd millennium, nagsugod na ang looming crisis sa kaparian, challenging in many parts of the church all over the world; and of course we remember that this crisis was brought about by the discovery of the sexual abuses that were perpetrated by priests of past decades,” si Bishop Afable namahayag.

Busa niadtong panahona, siya midugang, nga gilantaw nga mas haom nga ang tibuok Simbahan mag-ampo alang sa kaparian tungod niini nga mga hagit ug ang kaparian lakip na ang mga sumusunod mamahimong mas maamgohon ug mas sensitibo kabahin niini ug magmahinulsolon.

“Dili siya itago, dili siya i-limod, angkonon nga naa gyuy mga hitabo nga dili angayng mahitabo ug dunay mga nabiktima diin ang kaparian nga unta sila mismo ang mag-amuma sa ilang katawhan,” si Bishop Afable nagkanayon.

Niini nga adlaw, gi-aghat sa Simbahan ang kaparian sa pagpamalandong sa gasa sa pagkapari nga ilang nadawat gikan Kristo; ug ang tanang sumusunod gidasig sa pag-ampo sa ilang kaparian aron nga mamahimo silang lig-on sa ilang ministriya ug magpabilin nga lig-on sa ilang pagtahan ngadto sa Ginoo.

Mahinungdanon usab matud pa ni Bp. AFable nga ang katawhan magmaigmat ug mapadayonon nga mag-ampo alang sa kaparian, “because the reason why ang pari, hibalo na man ta nga ang rason ngano ang pari maoy number one nga target sa mga kaaway sa Diyos o kaaway sa simbahan, anaa ang daghang tawo nga madamay kon ang pari mahulog sa sala, sanglit siya ang pastor and as a shepherd, he has many dependents nga nagsalig sa iyang paggiya ug direksyon ug sa iyang pastoral care.”

Kung ma-compromiso ang usa ka pari, siya midugang, “it’s not only the priest that is compromised but the whole community he is serving is also hurt; kini ang idea nga we are one body, nga kung ang usa ka bahin dunay sakit, bation kini sa tibuok lawas.”

Sa kinatibuk-an, mao kini ang adlaw sa pagpenitensiya sa mga sala sa kaparian, ug ang ikaduha mao ang solidarity kon pakighiusa kanila aron nga masayran ug mabati nila nga nasabtan sila, ug gipasalamatan sa ilang mga maayong binuhatan.

“Not all priests are bad, there are many more priests who are faithful and true,” si Bp. Afable midugang.

Dugang niini, giangkon sa Obispo nga luyo sa negatibong epekto nga dala sa pandemiya ngadto sa panginabuhi sa katawhan ug sa pagsustenir sa mga parokya, nagmugna pa gihapon og katilingbanon nga aksyon ang kaparian pinaagi sa pagmontar og “kindness stations” nga gitawag og mga “lamesa.”

“Diri ang among mga ‘community pantry’ gitawag kini og mga lamesa sa ilang patron: (sama sa) Lamesa ni San Isidro,” siya midugang. “Ug this is usually appreciated sa mga urban centers dinhi sa poblacion, unlike sa mga rural parishes diin halos tanan dunay kaugalingon nila nga utanon, ilahang garden gamay, duna silay uma, so dili kaayo sila nanginahanglan kaayo og foodstuff.”

Bisan ug gipahugtan sa lokal nga mga gobyerno sa Probinsiya sa Davao del Sur ug sa Syudad sa Digos ang mga protocol alang sa paglikay sa COVID-19, namatikdan ni Bishop Afable nga duna gihapoy mga maisogong motambong sa Santos nga Misa sa adlawng Domingo taliwala sa polisiya nga “no movement Sunday.”

Apil sa bag-ong Advisory Guidelines No. 5, rule #F sa City Government of Digos diin ang relihiyoso nga mga serbisyo, mass gatherings ug uban pang mga leisure activities ug uban pa, gidid-an.

Tungod niini, gipahibalo sa Diocese of Digos ilabi na sa mga parokya sulod sa Digos City nga gidugangan ang anticipated nga mga misa sa adlawng Sabado, Hunyo 5 ug Hunyo 12 (4:00 pm ug alas 5:30 pm); ug i-livestream na ang tanang mga misa sa adlawng Domingo sa Hunyo 6 ug Hunyo 13.