Taliwala sa mga hagit bunga sa pandemya: Ebanghelisasyon padayon sa mga Katolikong Tulunghaan

Bisan ug mius-os gikan 5-35% ang kinatibuk-ang enrollment sa mga Katolikong Tulunghaan sa Davao, nagpadayon ang pagtahan alang Ebanghelisasyon pinaagi sa Katolikong Edukasyon.

Sa gipagawas nga taho sa Diocesan Catholic Schools Superintendents ngadto sa ulahing virtual nga panagtigom sa mga pastoral workers sa simbahan sa Davao, Digos, Tagum ug Mati ( DADITAMA), Hunyo 1, 2021, nahimong dakong suliran ang pag-us-os sa magtutungha ilabi na sa Grade School kon elementarya.

Matud pa ni Fr. Jay Ramos, Superintendent sa Diocese sa Mati, gigamit na nila ang nagkalain-laing mga plataporma aron sa pagpakatag sa impormasyon sama sa facebook, school wewbsite, radyo, print materials ug pahibalo human sa mga Misa.

Nahimong dakong hagit alang sa mga magtutudlo mao ang paghimo sa mga module, pag-train sa mga magtutudlo sa bag-ong mga media, dili bastante nga koneksyon sa internet u gang ubang dapit walay signal (mobile o internet).

“Dunay kalisdanan usab ang mga ginikanan sa ilang financial nga kapasidad sa pagpalit ug gadget or smartphones u gang pagduhaduha sa ubang mga ginikanan sa pagpa-enroll sa ilang kabataan ilabi na sa grade school,” si Fr. Ramos midugang.

Gawas pa niini, nakasinati usab sila ug kalisdanan kabahin sa kasaligan nga mga resulta sa tests, ang pagtubag sa mga ginikanan sa mga modules, nagkataas nga ihap sa mga dropouts, pagpasa sa blangko nga mga modules o answer sheets, ingon man ang nagkataas nga ihap sa mga suliran sa mental health sa mga estudyante, ginikanan ug mga magtutudlo.

Sa iyang kabahin, si Rev. Fr. John Macalisang, Superintendent sa Diocese sa Digos nagbutyag nga namatud-an nga ang mga estudyante nga wala kaayo nakaapas sa ilang pagtungha kasagran naggikan sa mga dysfunctional nga mga pamilya, o ubos lamang ang edukasyon sa ginikanan ug dili makagiya sa ilang mga anak sa pagtungha nga anaa sa high school hasta na ang mga estudyante nga dunay adiksyon sa gadget.

“There is a correlation between high and low and non-performance of students with parental supervision,” si Fr. Macalisang midugang. “Gikinahanglan ang higpit nga koordinasyon tali sa ginikanan ngadto sa administrasyon sa tulunghaan ug sa mga magtutudlo.”

Namahayag si Rev. Fr. Russell Bantiles, bag-ong natudlo nga Superintendente sa Diocese sa Dabaw nga kabahin sa katekesis sa mga magtutungha, lisod nga tutukan ang espirituhanon nga kalambuan tungod sa “no face to face” nga polisiya. Mamahimong ipahigayon ang rekolesyon ug retreat online apan labing dakong hagit ang paghatag sa First Communion.

Hinoon, gipahimuslan sa pipila ka mga tulunghaan ang pag-ayo o pag renovate sa ilang mga pasilidad samtang wala pa gitugutan nga motambong sa klase ang mga estudyante.

Sa Diocese sa Tagum, gibutyag ni Mrs. Emma Peligro, representante ni Fr. Tom Avila, Jr. , nga gipatuman ang mga hinanaling aksyon sa pagtabang sa mga tulunghaan.

“Support major projects towards improving the quality of teaching-learning experience at our schools, such as building construction/repairs, offering of additional SHS course, procurment of equipment (school transportation vehicle), and taking over the management of a school with the lowest enrollment,” si Mrs. Peligro nagkanayon.

Sa pagkakaron nga nahuman na ang School Year 2020-2021, nagbilin siya ug pangutana: “What will be the fate of private schools in the incoming SY and onwards?”

Busa importante, siya midugang, nga ikampanya ang pagpadala sa mga anak ngadto sa mga Katoliko nga mga tulunghaan, paghatag ug scholarship, magtambayayong pinaagi sa partnership ug suportahan ang mga magtutudlo ug staff sa mga Katolikong tulunghaan, si Mrs. Peligro midugang.

Tungod niini, gipasalamatan ni Arsobispo Romulo Valles ang matud pa niya, nga nahabilin nga kusog sa mga Katolikong Tulungahaan, nga mao ang Christian commitment ug ilang dedikasyon.

Si Mati Diocese Bishop Abel Apigo nagbutyag nga gikatakda sa bulan sa Hunyo ang pagkumpirma sa kabataan sa mga simbahan o gymnasium nga ginasunod ang lagda sa Inter Agency Task Force on Emerging Diseases nga 50% lamang sa kapasidad sa venue ubos sa Modified General Community Quarantine (MGCQ).

Dakong pasalamat usab ang Diocese sa Mati Associaton of Catholic Schools sa tabang nga nadawat gikan sa Ateneo de Davao University kabahin sa connectivity alang sa mga estudyante pinaagi sa programang ACCESS Mindanao.

Proyekto kini sa Ateneo de Davao University (AdDU), sa pakigtambayayong sa ubang mga academic institutions, government agencies, ug pribadong mga institution, nga gitawag ug AdDU Community Connectivity Empowered by Satellite Service for Mindanao (ACCESS Mindanao).

Naghatag kini ug alternatibo nga mga solusyon sa paggamit sa satellite technology sa pagtubag sa mga suliran sa online connectivity, gawasnon nga pag-access sa Internet, ug pagpalambo sa kalidad sa kinabuhi sa katawhan sa Mindanao.