“Asin ug Kahayag sa Katawhan”

Kumusta ba ang kinabuhi? Naay motubag ngit-ngit pa sa alkitran. Ang uban pud hastang pagkapait. Ngano kaha? Siguro grabe ang mga problema ug pag-antos nga gipas-an sa kinabuhi.

Diha sa mga pagbasa, ang Ginnoong Dios mao ang kahayag nga naglamdag sa pagpuyo nga matarong ug tinuoray nga kinabuhi – ang pag-atiman sa mga gigutom, walay balay ug walay bisti. (Isaias 58:7) agig pagpadayag ug pagpuasa.

Dili lamang sa pagbuhat ug ritwal kundili ang diwa sa tinuod nga pagsunod nga kinaiya, ang kahayag mosidlak sa kangit-ngit (Isaias 58:10). Sa Ebanghelyo ni San Mateo, si Hesukristo nag-ingon sa iyang mga tinun-an, kamo ang asin ug kahayag sa katawhan (Mateo 5:13-14).

Usa kini nga angayang pamalandongan sa mga sumusunod ni Kristo. Kitang mga binuyagan gitugyanan ug gahom aron mapanindot ang templo sa kinabuhi ug lamdagan ang kangitngit nga dalan.

Kinahanglan ba kining tahas sa pagka-asin ug pagkasuga sa palibot karon? Sa katilingban nga nagkatibulaag ug nagkagubot tungod sa bahandi, gahum ug pagkahakog, sa pamilya nga walay pagtinagdanay tungod sa pagka-”busy” sa pagpanginabuhi, sa mga “gadgets”, TV, cellphones, computer? Ug sa kaugalingon nga walay katagbawan tungod sa mga material nga butang ug mga taphaw’ng kalingawan sama sa mga droga, ilimnon, sugal, sex ug mga kalibutanong butang?

Si kristo mao ang kahayag mga mianhi sa kailbutan aron maluwas kitang mga makakasala nga nagpuyo sa kangitngit. Siya usab ang misalig ug pagtugyan sa kahayag ngadto sa mga kristiyanos.

Pinaagi sa pagsangyaw sa maayong balita, diha sa gahom sa Espirito Santo (1 Cor 2:4) ipadayon nato ang pagwali isip nakadawat sa tahas o misyon isip sumusunod ni Kristo. Dili man kita takos apan si Hesukristo ang nagmando kanato nga ipadayag siya sa katawhan. Buhaton lamang nato ang pagsaksi kaniya pinaagi sa atong mga maayong buhat sa katawhan sa pagpaambit sa panahon, talento ug katigayunan alang sa Iyang himaya.