Ang kahulogan sa maghimaya ka Maria!

Ang pag-ampo sa Mahal nga Birheng Maria usa ka bililhon ug may makahuloganong kahulogan kanatong mga Kristohanong Katoliko. Una, ang paghatag nato ug pagtahud ug pagdayeg sa Inahan sa atong Manluluwas, sanglit si Birheng Maria mao man ang napili sa Dios aron diha kaniya ipakatawo ang moluwas sa katawhan nganhi sa kalibutan. (cf. Genesis 3:15, Isaias 7:14, Mateo 1:23, Galacia 4:4). Ikaduha, pinaagi ni Birheng Maria Inahan sa Dios, ang Hari sa kalibutan nahimo niyang Anak, ug ang nagsakripisyo, nagsakit ug nagpakamatay  pinaagi sa paghalad niya sa iyang sagradong lawas ug dugo para makabaton kita ug kaluwasan gikuha nganha kaniya lamang ( Hebreo 9:22, 10: 10-11 ug Galacia 4:4). Ikatulo, ang pag-ampo nato sa Mahal nga Birheng Maria dili pag-ampo nga  sama sa pag-ampo nato sa Dios nga mao ang pagsimba o ADORATION kondili mao lamang ang paghatag ug pagtahud nganha kaniya o VENERATION.

Tungod sa iyang pribilihiyo nga nahimo siyang Inahan sa Dios (cf. Lucas 1:43), kay si Kristo dili lamang Tawo kondili matuod usab nga Dios ( Tito 2:13, Juan 1:1, 14 ug Roma 9:5) maoy naghatag nato ug dakong pagdayeg ug pagtahud nganha kaniya . Busa nag-ampo ta kang Birheng Maria isip atong Langitnong Inahan nga maoy mo-amoma kanato, motabang ug iya unta kitang i-ampo ngadto sa iyang Anak nga si Hesukristo ug angay natong hinomdoman nga wala gayoy Anak nga makabalibad sa hangyo sa iyang inahan. Napamatud-an kini diha sa Balaang Kasulatan, sa dihang si Maria mihangyo sa iyang Anak nga si Kristo ug iya kining gituman sama sa nahitabo diha sa Kasal sa Cana (cf. Juan 2:1-10).

Mismo ang atong Ginoo iyang gitugyan ang iyang Inahan dinhi kanato aron atong mahimong Inahan (cf. Juan 19: 26-27). Usa sa opisyal ug komun  nga pag-ampo nato kang Maria mao ang MAGHIMAYA KA MARIA o HAIL MARY. Ang unang bahin sa maong pag-ampo mao kining mosunod : “Maghimaya ka Maria, napuno ka sa grasya ang Ginoong Dios maanaa kanimo, ug bulahan ikaw sa mga babayeng tanan ug bulahan usab ang bunga sa tiyan mo nga si Jesus.“ Kini nga pag-ampo mao ang pagdayeg kang Maria o prayer of praise, gikan kini sa mga pulong ni Arkanghel Gabriel  ug kang Santa Elizabeth nga inahan ni San Juan nga magbubunyag ug asawa ni Zacarias. Gikan usab kni sa latin nga pinulongan nga AVE MARIA, usa ka langitnon ug balaanong pagtimbaya (angelical salutations).