Ika-28 nga Kapistahan ni San Isidro Labrador Nagmalampuson

Nagmalampuson nga gisaulog sa GKK San Isidro Labrador, Juliville nga sakop sa Sona 8 sa St. Mary of the Perpetual Rosary Parish ang ika-28 nga Kapistahan sa Mahal na Patron, San Isidro Labrador niadtong Mayo 18, 2021. Miduyog ang mga GKK Servant Leaders ug mga Miyembro sa maong katilingban sa selebrasyon sa dakung kamaya ug pasalamat.

Si San Isidro Labrador giila nga usa ka patron sa Madrid Espanya ug siya mao ang patron sa mga mag-uuma ug mga mamumuo. Usa siya ka maayong tawo ug ginapakita ang iyang dakung paghigugma ug pagtuo sa Dios pinaagi sa pagtambong sa Misa matag adlaw ug sa daghan pang birtudes nga iyang gipakita sa dihang buhi pa siya niining kalibutan. Usa siya sa mga giila nga mga Santos dinhi sa Pilipinas ug ang iyang asawa usab nga si Maria Dela Cabeza giila nga balaan nga babaye.

Ang kapistahan ni San Isidro Labrador ginasaulog matag Mayo15 apan tradisyon na sa GKK San Isidro Labrador, Juliville nga saulogon ang kapistahan matag Mayo 18. Gipahigayon ang Santos nga Misa sa alas sais sa buntag diin gipangulohan kini sa Parochial Vicar, Fr. Rey Sabuero. Ang tema sa kapistahan mao ang: “San Isidro Labrador, Panig-ingnan sa Pagkamaampoon, Pagkamasaligon ug Pagkamanggihatagon sa gasa ngadto sa uban niining tuig sa misyon”. Isip pagpangandam sa maong kasaulogan nagpahigayon og mga aktibidades ang GKK sama sa siyam ka adlaw nga pagnobena ug pagprusisyon sa Patron palibot sa Juliville Subdivision. Sa tanang kalihukan gisunod sa katilingban ang health protocols nga ginapatuman sa panggamhanan.

Sa pagsaulog sa kapistahan sa Mahal na Patron dinhi nasinati nga napuy-an gayud sa mga miyembro sa katilingban ang mga hiyas ni San Isidro Labrador nga makita sa namugnang tema. Napuy-an ang pagkaampoon pinaagi sa pagtambong sa inadlaw’ng pagnobena, pag-ampo alang sa kaayohan ug kaluwasan sa tanan, pag-ampo sa Santos nga Rosaryo, Divine Mercy Chaplet ug uban pa.

Napakita ang Pagkamasaligon pinaagi sa makanunayong pagsalig sa Ginoo taliwala sa mga kalisud sa panahon. Kahadlok ang nasinati sa matag-usa sa maong pandemya apan gihalad sa mga GSL ang tanang nakalatid nga mga plano ngadto sa labaw’ng Makagagahum ug padayon gihapon sa paglaum nga matapos ra kining tanang mga kakulian nga ginasagubang sa tibuok kalibutan.

Labaw sa tanan makita gyud ang Pagkamanggihatagon sa mga miyembro sa katilingban sa pagpaambit sa ilang mga gasa nga nadawat sa tibuok tuig ug isip pasalamat pinaagi sa paghalad alang sa mga beneficiaries sa Food Bank for the Poor Program sa Parokya ug suporta pinansyal alang sa nagpadayong mga proyekto sa Kapilya.

Tungod niini nagpasalamat si Fr. Rey sa makanunayong pagsuporta sa katilingban ngadto sa mga kalihukan nga ginapahigayon sa Parokya.

Gipaambit usab sa mga pangulo ug mga miyembro ang ilang pagkamanggihatagon sa katilingban pinaagi sa paghatag og mga pagkaon alang sa fellowship inigkahuman sa Santos nga Misa tungod niini mapasalamaton ang PSK nga si Mrs. Emma Bulao sa ilang mga suporta ug paghalad.

Matud pa sa mga GSL nga daku ang ilang kalipay tungod kay nahibalik na ang pagsaulog sa Santos nga Misa karong tuiga. Mahinumdoman nga naundang ang tanang mga aktibidades sa mga simbahan tungod sa lockdown. Adunay kahingawa ang nasinatian sa kinabuhi sa mga taga SIL Juliville tungod sa pandemya ilabina nga nakasanayan na sa katawhan ang pagtambong sa misa matag Dominggo sa kapilya. Ang pagbalik sa selebrasyon usa ka maayong balita alang sa katilingban tungod kay mapadayon na ang mga plano ug mahibalik na ang kainit sa pagdebosyon diha kang San Isidro Labrador.

Tumong sa GKK nga niining tuig sa misyon, mapadayon sa mga pangulo ang tahas nga gibilin ni Kristo. Taliwala sa tanang mga grasya ug panabang nga nadawat, padayonon gihapon ang pagka mapaubsanon sa matag-usa ilabina nga kining tanan gasa lamang sa tanang kaayuhang nadawat sa Dios Amahan. Naglaum ang mga pangulo ug miyembro nga pinaagi sa pagsunod sa mga birtudes ni San Isidro Labrador, mas mapalambo ang pagserbisyo sa matag-usa sa katawhan. Nagtuo ang katilingban nga ang pagsalig sa labaw’ng Makagagahum inubanan sa pangaliya sa Mahal Patron ang magsilbing kusog ug kahayag sa katawhan niining kangitngit nga nasinatian tungod sa pandemya.

Viva Sr. San Isidro Labrador!

I-ampo mo kami sa Dios!

(Allyza Hope Tabigue, GKK SoCCom | St. Mary of the Perpetual Rosary Parish)