Adlaw sa mga Gagmay’ng Kristohanong Katilingban

Niadtong tuig 2017, gideklara sa mga kaobispohan sa Pilipinas, kon Catholic Bishops’ Conference of the Philippines (CBCP), nga saulogon ang adlaw sa mga Gagmay’ng Kristohanong Katilingban, kon GKK, matag kasaulogan sa Solemnidad sa Santisima Trinidad. Pinaagi niini, ilang gipanghinaut nga mapalawman pa nato ang atong pagsabot sa Simbahan nga mopuyo diha sa kahiusahan sa pagtoo tungod kay ang kinabuhi ug misyon sa Simbahan nagasukad man sa Santisima Trinidad.

Sama sa nagkalahi nga Persona sa usa ka Dios, magkahiusa usab unta ang bag-ong pamaagi sa Simbahan nga gipadayag diha sa kinabuhi sa GKK. Ang nagkalahi nga mga taras sa mga sakop sa GKK makapuyo unta sa pag-inambitay ug pagtambayayong sama sa tiunay nga mga managsuon sa usa ka Kristohanong katilingban. Ang kinabuhi sa pag-ampo, pagtudlo ug pag-alagad madayag unta diha sa matag adlaw nga pagpatunhay sa usa ka mithi ug damgo sa katawhan nga puno sa paglaum, gugma ug pagtoo.