Paglunsad sa “CARITAS KINDNESS STATION” sa St. Joseph Parish

Gipahigayon ang paglunsad sa Parish Food Bank for the Poor, CARITAS KINDNESS STATION, sa St. Joseph Parish, Sasa niadtong Mayo 23 sa buntag, adlaw’ng Dominggo.

Ang maong kalihukan gisugdan sa usa ka Santos nga Misa nga gipangunahan ni Rev. Fr. Leonardo Dublan, Jr., kura paroko ug kasamtangan Social Action Director sa Archdiocese of Davao. Gisundan dayon kini sa seremonyas sa pagputol sa ribbon ni Bro. Victor Miclat, ang PSAM Coordinator, giubanan ni Sis. Bing Micayabas, usa sa mga Pangulo sa Alagad.

Ang kalihukan han-ay, hapsay ug may kalinaw, tungod kay ang tanan nagsunod sa health protocol ug gihatagan og prayoridad ang mga beneficiaries sa Food Bank. Ang uban miagi sa lugar sa donasyon, aron ihatag ang ilang mga gidala alang sa uban nga nanginahanglan, ug may plastic bag alang sa ilang pagpili sa produkto sumala sa ilang mga panginahanglanon. Sila moagi sa usa ka lugar alang sa pagsulat sa ilang mga pagbati ug pagpasalamat ug gipapilit kini sa bungbong, ug ang uban nag-ampo sa atubangan sa imahen ni San Jose.

Dili mapugngan ang pagpasibaw sa pagpasalamat sa pipila sa akong nahinabi sama nila ni Riza Aljas sa GKK San Vicente Ferrer, Cressa, ug nila ni Angelita Ortiga, Tess Ureta, Beth Justin ug Anecita Cagaanan. Matud pa nila, “Wala gyud kami magdahum nga makabitbit niining mga pagkaon. Salamat San Jose ug salamat Ginoo sa imong kaayo, sa imong grasya ug bendisyon, maghatag og dugang kabaskog sa among kinabuhi.”

Sobra gatos ka mga beneficiaries ug uban pa nga nanginahanglan usab sa mga grocery items nga mipasibaw ang ilang dakong pagpasalamat ngadto sa Ginoo sa iyang kaayo ug ngadto usab sa pagpasalamat sa maong programa nga gipangunahan ni Fr. Bong. Gidayeg usab ang kakugi nila ni Beth Donasco ug sa PSA Team nga gipanguluhan ni Amy Gravino ang Coordinator sa Pangulo sa Alagad.

Kini usa ka kasinatian nga angay hinumduman sa unang higayon nga nahitabo sa Parokya, usa ka paagi nga mabansay ang pagkamahigugmaon ug pagkamanggihatagon sa tawo ug maantigong moatiman ilabina niadtong labi pang nanginahanglan. (Amie Desquitado | St. Joseph the Worker Parish SoCCom)