Salamat “Brother,” “Sister,” “Father”

Matag karon ug unya, mahibalag nato ang mga relihiyosong Dominican, Carmelite, Benedictine, Franciscan, Redemptorist, Salesian, Marist, Pauline, Hesuita, ubp.  Mga Pari, mga Madre, Brothers sila. Gawas sa ilang mapuslanong mga kaakuhan sa katilingban, nagahatag sila og kusog nga pagsaksi sa kinabuhing hinalad sa Dios. Ang ilang sumbanan nagatudlo ug nagapahinumdom kanatong mga binunyagan, sa pagkinabuhi sa kasantos ug pagpangalagad sa Dios ug isig-kaingon.

Kining atong mga igsoon kadaghanan kanila nahilambigit sa edukasyon sa mga kabataan ug kabatan-onan. Pipila kanila anaa sa apostolado sa Gugma ug Kalooy alang sa mga katawhan nga anaa sa kawad-on ug kaalaot, mga masakiton ug mga sinalikway ug biniyaan. Dili kaayo daghan ang nagadumala ug nagatabang sa Parokya. Ug dili usab daghan ang anaa sa apostolado alang sa mga Lumad.

Mapasalamaton kaayo kita alang kanila nga anaa lamang sa mga monasteryo. Nagaduyog sila sa misyon sa Simbahan pinaagi sa kahilom ug pag-ampo. Uban kanato dinhi ang mga Carmelites, Pink Sisters, ug Benedictines. Ang ilang walay hunong nga pag-ampo ug pagpenitensya nagadasig ug nagalig-on sa atong mga gipanlimbasugan ug gitinguha.

Karong Dominggo Pebrero 2, gitakda ang tinuig nga pagsaulog sa mga igsoon natong magtotoo nga hinalad ang tibuok nilang kinabuhi ngadto sa Dos. Sa pangilin sa paghalad sa Ginoong Hesus didto sa templo, gitakda ang maong selebrasyon.  Sama ni Kristo, mahimo sila usab nga mga gagmay’ng iwag sa ilang palibot nga magadan-ag niadtong nagalakaw sa dalan sa kangitngit.

Kining maong pagsaksi nila mao ang mahinungdanong bili sa ilang pagka-anaa sa atong taliwala. Ang Kristohanong katilingban, ang tulunghaan, ang Parokya ug mga organisasyon sa Simbahan nga dunay mga Relihiyoso, nabulahan kay matagaan ug bililhong gasa alang sa kalamboan sa kinabuhi sa pagtoo.

Niining Dominggoha, itugyan nato sila sa Maloloy-ong Amahan sa langit nga iyang lig-onon pa ang ilang pagtoo, paglaum ug paghigugma sa Dios ug sa ilang isigkatawo. Pahalipayan nato sila pinaagi sa atong pagtext kanila, pagsulat, pagtawag, pagtimbaya, pagbisita. Ipadangat kanila ang atong mainiton ug mapasalamatong pag-ila sa bili sa  ilang pagka-anaa sa atong taliwala. Dungan usab niini ang atong pagtahan sa kaugalingon nga magpadayon nga makig-alayon kanila sa mga buhat alang sa kahimayaan sa Ginoo ug kalamboan sa Iyang Simbahan.