Sta. Cruz: Timaan sa Kadaugan Gikan sa Kamatayon sa Sala

Ang parokya sa Sta. Cruz sa Talicud, Island Garden City of Samal, nagsaulog sa ilang ikalima nga kapistahan sa parokya niadtong Mayo 3, 2021. Ang Santos nga Misa gipangulohan ni Rev. Fr. Pepe Retorca, kura paroko sa Sto. Niño Parish, Kaputian, ug ang Vicar Forane sa Immaculate Conception Vicariate. Nagkonselebrar usab sila Rev. Fr. Jakel Solde, SVD, Rev. Fr. Jing Garcia, SVD, ug Rev. Fr. Oliver Maningo, SVD kinsa produkto sa maong parokya. Si Rev. Fr. Rodrigo Salac, SVD, kura paroko, miuban mismo sa mga choir sa Santos nga Misa nga nagpa-solemne sa maong kasaulugan.

Sa iyang homiliya, gisaysay ni Fr. Retorca nga ang Sta. Cruz mao ang iyang paborito nga kapistahan kanhi tungod sa Santacruzan. Ug dali lang kaayo natong mahinumduman ang Sta. Cruz tungod sa atong akto sa pagpanguros. “Nganung manguros man ta? Mao kana ang pinakamubo nga pagpadayag sa atong pagtuo. Nagatuo kita sa tulo ka Persona apan usa ka Dios – ang Amahan, ang Anak ug ang Espiritu Santo,” matod pa ni Fr. Retorca.

Gipunting usab ni Fr. Retorca ang pinakauyokang kahulogan kon nganung ginasaulog nato ang piyesta sa Sta. Cruz. Matod pa niya, “Diha sa Krus, giluwas kita ni Cristo. Naluwas kita pinaagi sa gugma sa Dios. Bisan paman diha sa Krus, diin Siya namatay, nahimo kining timaan sa kadaugan sa kamatayon, gikan sa kamatayon sa sala.”

Human sa Santos nga Misa, wala nay giandam nga kalingawan ang parokya tungod sa kasamtangang sitwasyon sa pandemya. Apan adunay gamay nga panagsalo-salo alang sa mga nangandam ug mga lumilihok sa maong kasaulogan.