Mga parokyano sa Malabog mipaambit sa dala nga mga grasya

Miduyog ang mga GSLs sa nagkalain-laing Gagmay’ng Kristohanong Katilingban (GKKs) sa San Roque Parish, Malabog sa pagsaulog sa ika-7 ka tuig nga kapistahan ni Sr. San Jose sa Sitio Beto. Kini ang usa sa mga pinakalayo nga GKK nga sakop sa parokya nga dili pa kasudlan ug sakyanan.

Pasado alas syete sa buntag, human sa misa sa parokya, nibyahe og sobra oras ang ubay-ubay nga mga parokyano padulong sa Sitio Bal-ong diin magsugod ang pagbaktas ngadto sa Sitio Beto. Bisan paman sa lubak-lubak nga dalan, naghinam-hinam gihapon ang tanan nga mahimamat ang mga lumulupyo sa Sitio Beto. Taliwala sa init nga panahon, gipangunahan ni Fr. Arnold Balaquinto, Parish Priest sa San Roque Parish, ang kapin usa ka gatos ka parokyano nga namaktas ug mitungas sa mokabat sa unom ka kilometro nga bukid. Naabot ang grupo sa maong lugar mga alas dyes pasado sa buntag. Gilayon nga nangandam ang mga parokyano alang sa Santos nga Misa nga gipanguluhan ni Fr. Arnold.

Gisaysay ni Fr. Arnold Balaquinto sa iyang homiliya nga ang pagkinabuhi nga matarong, abli og pang huna-huna, simple, Yukaristiko, maampoon ug mapaubsanon sama ni Sr. San Jose mao ang angay nato nga sundon.

Una ang katapusang panalangin, gipasalamatan sa PSK kon Pangulo sa Katilingban sa GKK San Jose, Beto nga si Piolo ang tanang mga bisita gikan sa dose ka sona sa nagkalain-laing ministriya.

Human sa misa, dungan nga nangaon ang mga bisita ug ang katilingban. Ug sanglit kay gisaulog man ang ika kinyentos ka tuig sa Kristyanismo sa Pilipinas nga adunay temang “Gifted to Give”, gipamatud-an kini sa mga mahigugmaong mga parokyano diha sa kinasing-kasing nga pagpaambit sa ilang mga dalang grasya sama sa canned goods, noodles, bugas, biscuits og uban pa. Nag-andam usab og kalingawan ang ministriya sa batan-on nga nakapahugyaw sa tibuok sitio. Ug gani wala sila nagpaulahi sa tiktok dance craze nga “skirii” diin gisalmutan sa mga batan-on, hamtong ug tigulang.

“Dako kaayo ang akong kalipay nga nabati nga nahimamat namo ang katilingban sa San Jose- Beto. Sa mga batan-on nga bisan paman sa linghod nila nga pangidaron apan nakat-on na sa pag-alagad nga tiunay sa Ginoo, padayon lang kamo. Kami nga mga hamtong uban ni Father Arnold kanunay andam nga mo suporta kaninyo.”, Kini ang mensahe ni Bro. Jerry Piogado, usa ka PSK gikan sa San Vicente Ferrer Zone 2.

“Not everyone is given a chance to be here, but I am so lucky and I thank God for choosing me. Sa katilingban sa Beto nga mainiton kaayong nidawat sa amoa, salamat kaayo sa mga pagtulon-an. Your smiles are amazingly awesome nga nipapas sa kakapoy nga among nabati diha sa among pagbaktas.” Kini usab ang gipadayag ni Jozeil Crodua, PSB Coordinator sa San Jose, Ipil GKK, Zone 2 ug myembro sa core group sa Ministriya sa Batan-on. “Serving God is the happiest of all”, dungag pa ni Joziel.

Mihulma sa tagsa-tagsa ka mga nawong sa mga nangadto sa Sitio Beto ang matam-is nga pahiyom samtang malipayon silang namaktas pauli sa ilang mga panimalay. (Imelda Overiz)