KNOT: Jasper

Dear KNOT,

Maayong adlaw sa tanan. Itago na lang ako sa ngalang Jasper, minyo ug dunay 2 ka anak. Ang akong kasinatian mahitungod sa dihang ako nagpangita pa ug trabaho kaniadto. Aduna akoy trabaho niadto apan sa akong pamatyag igo-igo ra gayud kini. Ug bisan duna sab trabaho ang akong asawa apan sakto ra nga maka sustiner. Kuntento na sa kuntento apan akong gitimbang-timbang nga sa pag-abot sa panahon nga muabot na sa saktong edad ang akong mga anak, mo-eskwela na kini ug kinahanglan na og extra nga kita alang sa mga galastoson.

Nangita ako og laing kapanguhaan. Apply diri, apply didto. Mga rejections, disapproval, turn down. Akoa kining naagian. Padayon gihapon ako sa pagpangita ug maayong kapalaran. Usahay mawad-an na ako sa pasensiya. Makahuna-huna og hunong sa pagpangita. Apan sa pag-uli ko sa among panimalay, akong makita akong mga anak, madasig ako pag-usab sa pagpaningkamot. Unsaon na lang ang kaugmaon nila kung dili matagaan og pagtagad ang ilang mga panginahanglan. Daghan ako og mga kabalaka sa umaabot mao nga akoa pang gidoble ang pagpaningkamot inubanan siyempre og hugot nga pag-ampo.

Sa gidugayon nga pagpaabot, salamat sa Ginoo ug dunay mitubag sa akong application online. Usa ka pribado nga kumpanya sa nasud Singapore. Natubag ang akong mga pag-ampo nga makapanarbaho ug dunay sobra pa sa saktong abot aron magamit sa pagpa-eskwela sa mga bata ug haruhay nga pagpamuyo.

Taas-taasan lang gayud ang pasensiya sa pagpaabot kay nasayud ang atong Ginoo sa kung unsay atong mga panginahanglan. Iya kining ihatag sa tamang takna ug igong panahon. Usahay sobra pa sa imong ginapaabot. Daghang salamat.

Jasper

P.S. Pasensiya ug pailob tinuod dunay maayong dangatan. Ang Dios Amahan kanunay nagpakabana sa matag-usa kanato. Ato lang hinumduman anaa Siya sa atong taliwala labaw na sa panahon nga kita anaa sa kalisod ug mga pagsulay. Sa matag sangpit nato sa iyang ngalan kini makapahimuot sa Dios Amahan.