Jade Valley, Malampusong Gisaulog ang Kapistahan ni Sr. San Jose

Malipayon ug malampusong gisaulog ang ika-26 ka tuig nga kapistahan sa Mahal na Patron, Sr. San Jose Ang Mamumuo sa GKK Jade Valley Homes, Tigatto, Zone 8 nga nahisakop sa St. Mary of the Perpetual Rosary Parish nga adunay tema, SAN JOSE: Modelo sa buhing pagtoo, sumbanan sa pagkamanggihatagon ug pagkamalahutayon sa pagsalig sa atong Ginoo taliwala sa hagit sa panahon karon.

Aron makahuluganon ang kasaulogan sa kapistahan, gisugdan ang pagpangandam sa pagpahigayon og pagrosaryo, hiniusang pag ampo, pagnovena ug procession diin pinaagi niining mga kalihukan nahiusa ang mga pangulo ug mga miyembro sa pagpadangat sa mga pangaliya ngadto sa Diyos pinaagi kay Sr. San Jose. Ang kasaulogan sa Santos nga Misa alang sa maong kapistahan gipahigayon niadtong May 1, 2021 sa alas 8:00 sa buntag sa kapilya nga gipangulohan sa Kura Paroko, Rev. Fr. Dionisio C. Tabiliran.

Adunay mga food packs nga gipaambit alang sa mga bisita ug sa mga kasilinganang GKK nga niduyog ug nitambong sa Santos nga Misa.

Makalipay ug makalingaw ang gidalit nga hamubo ug pinaabtik nga pasundayag sa mga kabatan-onan (Youth in Action). Simple pero rock nga presentation of talents.

Tungod sa maayong panig-ingnan ug pinaagi sa mga hiyas ni Sr. San Jose nga maoy sumbanan sa mga pangulo ug mga miyembro sa katilingban, nagmalahutayon ang kahiusahan ug kadasig sa pagpangalagad sa mga GKK Servant Leaders (GSLs) ug mga Tigpasayon Pundok Banay (TPB) sa makanunayong pag ampo sa pagrosaryo, sa hiniusang pag-ampo ug sa Regular Sunday Mass luyo sa hagit ug pagsulay niining panahon karon.

Ug tungod sa pagkamanggihatagon sa mga pangulo ug mga miyembro sa katilingban sa ilang talento, panahon ug bahandi, napalambo dili lang ang espiritual nga aspeto kundili apil ang estruktura sa kapilya diin napahigayon ang pagrenovate niini, pag accomplished sa mga proposed projects ug mga plano pinaagi sa pagtinabangay sa matag usa.

`1Gisilibrar karon ang tuig sa Mahal na Patron, Sr. San Jose dungan sa pagsilibrar usab sa ika 500 ka tuig sa atong pagkakristiyanos, ang tuig sa Missio ad Gentes, Gifted to Give. Haom kaayo kini kang San Jose tungod kay ang tanan nga iyang nadawat nga gasa gikan sa Diyos, iya usab gihatag ngadto sa tanang katawhan aron mahimong sumbanan paingon sa kaluwasan diin si San Jose usab ang Patron sa tibuok Simbahan. (Godoberta ‘Bebie’ Pecolados, GKK SoCCom)