May for Mary

Ang bulan sa Mayo, espesyal nga bulan nga gihalad ug gitagana alang sa atong Mahal nga Inahan si Santa Maria aron sa pagpasidungog ug pagpaila kaniya ilabina sa mga kabatan-onan. Nindut kini nga higayon nga kita makapadayag usab sa atong kinasing-kasing nga pagpasalamat kaniya sa kanunay niya nga pag-ampo ug paggiya kanato ilabina sa panahon sa mga kalisud ug kasakit. Tungod sa pandemya, adunay mga limitasyon sa pagpahigayon sa mga kalihukan, busa nagmugna ang DXGN 89. 9 Spirit FM- Davao og mga Online ug On-Air Activities sama sa Flores De Mayo ug Marian Exhibit. Mapasalamaton kita sa gasa sa teknolohiya ug media nga dakong tabang kanato ilabina niining panahon sa pandemya, dakong tabang sa pagpadayon sa misyon sa pagpa-ila kang Santa Maria isip gasa sa Simbahan ug kanatong tanan. Kay si Santa Maria, gasa man, angay nato siya nga ipaambit sa uban. Niining bulan sa Mayo, giimbitahan kita sa pag-apil sa mga programa ug pag-ampo diha sa online ug sa radyo aron mulambo pa ang atong pag-ila ug paghigugma kang Santa Maria aron ato usab siya nga mapaila ug madala sa uban. Ave Maria!