Pagka-Magsasangyaw Buhat sa mga Binunyagan

Domingo sa pagsaka sa langit sa Ginoo (May 16, 2021)
Acts 1:1-11 | Ps 47:2-3, 6-7, 8-9 | Eph 1:17-23 or Eph 4:1-13 or Eph 7:1-7, 11-13 | Mk 16:15-20

Ang Pagkayab ni Jesus didto sa langit, mao ang usa ka pagtulun-an nga nagtudlo kanato nga milingkod na siya balik sa iyang gingharian, diin iyang ibubo ang iyang gahom dinhi kanato nga naningkamot pa nga mosulod sa gingharian nga iyang gisaad. Mahimo natong saulogon ang pagsaka sa langit sa atong Ginoo nga usa ka okasyon aron ang pagtuo nga atong gipadayag isip mga binunyagan buhi ug nagalihok, kay siya mismo ang mopuno kanato sa grasya nga magmalampuson kini. Unsaon man? Ang pagpaningkamot nga maadunay kahiusahan tali sa matag usa, ilabi na diha sa mga GKK ug ngadto sa parokya. Ang tanang binuhat makighiusa usab sa kinaiyahan, pinaagi sa pagpakighigala kanila, nga maoy tumong ni San Francisco de Asissi. Mao kini ang unang ang-ang aron ang pagtuo ug ang atong mga lihok mahimong buhi.

Karong adlawa usab gisaulog sa tibuok Simbahan ang ika 55th nga kasaulogan sa World Communications Day. Matud pa sa Santo Papa Francisco, “Dali ug tan-awa” kon buot kita nga mamahimong matuod nga tig-balita o tigsabwag sa Maayong balita pinaagi sa mga himan sa komunikasyon. Una ipalapnag ang information o balita, susihon pag-ayo nga kini ba atong nakit-an ug nasinati, aron dili mamahimong bakak ang atong ipalapnag. Tan-awon pag-ayo ang panginahanglan sa isigkatawo, ug dili ipalabi ang kaugalingong interes. Tungod kay ang tawo gimugna sa dagway ug sama sa Dios nga sa walay hunong sa pag-communicate sa iyang kaugalingon pinaagi sa gugma. Kay mao kana ang atong identity (pagka-kita) isip usa ka pamilya. Diha sa atong bunyag kita nahimong sakop sa pamilya sa Dios, busa adunay sangon sa pagpaambit sa komun nga responsibilidad nga mosabwag sa pagtuo aron kini buhi ug nagalihok.

Gisaway sa anghel ang mga apostoles nga nagpadayon sa paghangad sa pagsaka sa langit ni Jesus, sa pag-ingon.” Hunong na sa paghangad sa langit.” Lihok! Si Jesus miingon: “ Panglakaw kamo sa tibuok kalibutan ug isangyaw kining Maayong Balita ngadto sa tanang tawo…”Ang pagka mag-sasangyaw dili trabaho sa mga Obispo, mga pari lamang, kini buluhaton sa tanang binunyagan. Kanus-a pa man kita molihok?