Flores de Mayo: Pag-alima sa Pagtuo

Ang Flores de Mayo, usa ka Kinatsila nga pinulongan ug gihubad nga “Mga Bulak Mayo”. Giingon nga kini gipaila sa mga misyonaryong Katsila kaniadtong tungatunga sa tuig 1800. Gisaulog kini adlaw-adlaw sa tibuok nga bulan sa Mayo agig papasidungog sa Mahal nga Birhen Maria, ang inahan sa atong Manunubos.

Matod pa ni Msgr. Ramon A. Pet, HP, chairman sa Archdiocesan Commission on Catechesis and Catholic Education (ACCCE) sa Jaro, “Ang ‘Flores de Mayo’ gihimo dili lamang alang sa kaayohan sa tradisyon apan sa pag-alima usab sa pagtuo ug gugma sa Ginoong Jesus pinaagi sa Iyang Inahan, ang Mahal nga Birhen Maria”. Gikanayon nga ang Flores de Mayo usa ka matahum nga tradisyon nga haduol sa mga kasingkasing sa Pilipino. Kini naila ug gitawag nga ‘Pueblo amante de Maria’ (mga tawo nga nahigugma kay Maria). Nan, kinahanglan nga huptan nato kini nga debosyon aron dili kini mawala bisan sa dili maayong impluwensya sa modernong kultura sa mga batan-on sa bag-ong henerasyon.

Matod pa ni Venice Sore, usa ka batan-on ug katekista sa Virgen Dolorosa Parish, Babak, nga sa panahon nga nag edad pa siya og 4-5 anyos, naga apil na gyud siya og Flores de Mayo uban sa iyang mga ig-agaw. Una sila muadto sa kapilya, manuroy usa sila sa mga balay-balay kay mangitag bulak diin maoy ilang ihalad para kay Mama Mary. Saysay pa ni Venice, “Lingaw kaayo muapil og Flores de Mayo, kanang mga sayaw ug kanta sa Flores, grabe kaayo makahatag og kabibo sa amoa. Tungod sa Flores de Mayo mas nailhan nako pag-ayo kung kinsa si Maria ug si Jesus”. Dinhi pud siya nadasig nga mag rosaryo kada adlaw. Gikanayon nga usa ka adlaw niana, nakaingon siya sa iyang kaugalingon nga “puhon ako nasad magtudlo sa mga bata panahon sa Flores de Mayo”.

Tuod man, pag edad niya og 15 anyos, nahimo siyang Katekista, ug ang iyang pangandoy kaniadto nga maoy mutudlo sa mga bata: sa pagpaila-ila kung kinsa si Maria ug si Jesus; kung unsaon pag rosary; ug labi na gayod sa pagtudlo sa mga “action songs” sa Flores de Mayo nga alang kaniya dili gayod ikalimod nga makahatag og kabibo, kining tanan natuman gayod. Dungag pa niya nga matag katapusang semana sa Abril naa gayuy mga bata nga muadto sa ilang balay kay mangutana kung unsang orasa magsugod ang Flores de Mayo. Pipila kanila moingon nang daan nga silay mudala sa isa sa mga letra sa AVE MARIA. “Matag kakita nako sa mga bata nga magsabay mag-rosary panahon sa Flores de Mayo, mutulo gayod ang mga luha sa akong mga mata tungod sa kalipay. Lami kaayo sa paminaw na ang atong mga kabataan nakaila ug adunay pagmahal sa Mahal nga Birheng Maria, ang Inahan sa atong Ginoong Manunubos”, dungag pa ni Venice.

Niining panahon sa pandemya, sanglit gidid-an pa ang mga bata sa pag-adto sa mga kapilya o mga parokya, isip usa ka katekista, naghimo si Venice ug usa ka inisyatibo nga iyang gitawag ug “DONATE A ROSARY AS WE ARE GIFTED TO GIVE”. Ang mga matigom nga rosaryohan sa maong inisyatibo, ipanghatag nila sa mga bata ug mga batan-on sa ilahang lugar aron pagdasig kanila ug padayong saulogon (sa panimalay) ang atong nahuptan nga debosyon sa Mahal nga Inahan. Hagit usab niya sa mga pamilya, labi na sa mga ginikanan, nga mamahimong katekista sa ilang kaugalingong panimalay.