San Vicente Ferrer Sumbanan sa Mapadayonong Pag-alagad

Si San Vicente Ferrer usa lamang sa mga Santos nga andam talikdan ang tanang kaharuhay sa kinabuhi, aron sa pagsunod ni Kristo. Andam siya sa pag-alagad taliwala sa kalisod nga naagian, andam sa pagtabang sa mga nanginahanglan, masakiton ug kapos palad. Usa ka santos nga kayang magpasabot sa nagkalahi lahing tawo, bisan paman nga dili kini niya pareho og pinulungan. Ug kining iyang mga hiyas, nahimo namong inspirasyon, nga sama niya, amo untang makab-ot, masunod ang iyang lakang sa pag-alagad sa atong Ginoo, nga walay pagduhaduha ug walay paghangad ug balos gikan kaniya, nga kinasingkasing kining buhaton.

Ang kapistahan ni San Vicente Ferrer, among ginasaulog, timaan sa among pagkamatinoohon ug pagkamalaumon sa atong Ginoo, nagapasalamat kami nga nahimo namong giya ug sumbanan si San Vicente Ferrer sa pag-alagad sa atong Ginoo.

Tungod sa maayong panig-ingnan ni San Vicente Ferrer, ang Gagmay’ng Kristohanong Katilingban sa San Vicente Ferrer, Balite-Zone 7 nga nahisakop sa Parokya sa St. Mary of the Perpetual Rosary Parish malipayon nga saulogon ang ika-64 ka tuig nga Kapistahan niini nga adunay tema: “Katilingbang manggihatagon, malaumon nga mapadayonon sa misyon sa pagsangyaw sa maayong balita uban sa pag-ampo ug giya ni San Vicente Ferrer.

Agi’g pagpangandam sa kasaulongan sa kapistahan ni San Vicente Ferrer gipahigayon sa katilingban ang siyam ka gabii nga pag novena, hiniusang pag-ampo ug sa pag prosisyon sa Imahen sa Patron palibot sa katilingban. Ang kasaulogan sa Santos nga Misa pagahimoon sa Abril 25, 2021 sa alas 6:00 sa buntag sa St. Mary of the Perpetual Rosary Parish Church.

Pinaagi sa mga hiyas nga nakuptan sa Mahal na Patron, nanghinaut na ang mga pangulo ug miyembro sa katilingban kanunay nga magmadasigon sa pagpadayon sa misyon ni Sr. San Vicente Ferrer diha sa matag-usa ug sa katilingban. (Michelle Dela Cruz, GKK SoCCom)