Mga Deboto Gihagit: Diosnong Kaluoy Ipasibaw

Luyo sa hagit sa pandemiya, gatusan ka mga deboto sa tibuok Arkidayosis sa Dabaw ang mitambong sa Santos nga Misa alang sa ika-31 nga Kapistahan sa Diosnong Kaluoy, kinsa gihagit usab sa pagpasibaw sa Diosnong Kaluoy.

Gipanguluhan ang selebrasyon ni Rev. Fr. Amado Arroyo, Spiritual Director sa Divine Mercy Apostolate sa Archdiocese of Davao ug kura paroko sa San Antonio Parish sa Agdao diin gipahigayon ang Santos nga Misa alas-3 sa hapon Abril 11, 2021, kapistahan sa Diosnong Kaluoy kon Divine Mercy Sunday.

Kauban ni Padre Arroyo nga nagsaulog sa Santos nga Misa mao sila si Fr. Marbendear Morallas, ang Episcopal Vicar for the Laity, Fr. Reygie Penecios (Parochial Vicar) ug si Fr. Jose Marie Escuadro.

“For those who are in love, there is no excuse to celebrate,” siya nagkanayon atol sa homiliya. Sama kang Santa Faustina, ang sekretarya sa Diosnong Kaluoy, iyang gipalanog ang pag-aghat sa Santo Papa ngadto sa mga Kristyanos ug mga deboto sa pag-abli sa kaugalingon, magmalipayon sanglit base sa nahipatik sa Diary ni Santa Faustina (# 699), “The soul that will go to Confession and receive Holy Communion shall obtain complete forgiveness of sins and punishment. On that day all the divine floodgates through which grace flow are opened. Let no soul fear to draw near to Me, even though its sins be as scarlet.”

Walay kinutuban ang Kaluoy sa Ginoo busa gidasig ni Fr. Arroyo ang mga deboto sa pagsangyaw niini ug ipaambit sa uban, “So, sa ato pa, ang atong pagka-deboto/tante sa Diosnong Kalouy dili lamang kutob sa pag-ampo. Dili lang ang pagkanta sa chaplet. Dili lang ang pagsuot ug unifom. My dear brothers and sisters, my fellow devotees, The Divine Mercy of God is immeasurable, then lets show it, share it to others.”

Human sa Santos nga Misa, pormal nga gi-anunsyo ni Mrs. Emilia Sitjar ang iyang pag-retiro ug pagtunol sa katungdanan isip lay coordinator sa Divine Mercy Apostolate sa Archdiocese of Davao ngadto kang Ms. Joji Ilagan-Bian pinaagi sa pagbasa sa sulat gikan kang Archbishop Romulo G. Valles, D.D. nga pinetsahan og Marso 9, 2021.

Mapasalamaton ug iyang gi-aghat ang mga deboto gikan sa 28 ka mga parokya sa pagsuporta sa bag-ong lay coordinator, “Support Joji all the way without hesitation,” si Sitjar nagkanayon.

Kinasingkasing usab nga gidawat ni Bian ang maong katungdanan ug gipasalamatan usab si Sitjar sa pagdawat sa maong posisyon gikan sa iyang inahan nga si “Inday” Ilagan, kinsa unang mipalapnag sa maong debosyon dinhi sa Davao ug sa tibuok Mindanao.

“Salamat usab kaayo sa imong pagdawat sa pagserbisyo sa apostolado gikan sa akong inahan trese ka tuig na ang milabay, samtang naghigda na kini sa ospital,” gibutyag ni Bian.

Sa iyang pagdawat sa katungdanan gikan kang Sitjar, si Bian naghangyo usab sa mga kaubanan nga mga devotees sa pag-ampo nga tabangan siya sa Diyosnong Kaluoy aron nga mapalapnag pa ang debosyon sa tanang 39 ka mga parokya sa Archdiocese of Davao.