“Ania kita sa talagsaong panahon sa grasya sa Dios” – Msgr. Rodulfa

Giablihan na ang pultahan sa 7 ka mga Simbahan sa Arkidayosis sa Davao sulod sa Oktaba kon walo ka adlaw o unang semana sa panahon sa Pasko sa Pagkabanhaw sa atong Ginoo. Ang parokya ni Sr. Santiago Apostol sa Bunawan mao ang kataposan nga mipahigayon niini niadtong milabay nga Domingo, Abril 11, 2021.

Sa iyang pamalandong atol sa Misa, si Msgr. Julius Rodulfa, Episcopal Vicar for the Clergy, Vicar General ug Pastoral Director sa Arkidayosis sa Davao, nanukad sa pag-ingon nga “ania kita sa talagsaong panahon sa grasya sa Dios.” Daku na kaayo nga hitabo, matod niya, ang pagkabanhaw sa atong Ginoo diin sulod sa Oktaba niining Pasko giablihan ang mga balaang pultahan kon holy door sa mga Jubilee Churches.

Si Msgr. Rodulfa nagpahinumdom nga sa atong pagsaulog sa ika-500 katuig na sukad kita nahimong mga Kristiyanos, “nadawat nato ang pagtoo gikan sa Dios pinaagi sa mga gigamit niyang instrumento sa atong kasaysayan.” Laing hinungdan usab kini sa dakong panahon sa talagsaong grasya, matod niya.

Ang maong balaang pultahan sa parokya ni Sr. Santiago giablihan alang sa tibuok vicariate sa St. James, Bunawan nga mao ang mga parokya sa St. John the Baptist (Lasang), St. Joseph the Worker (Sasa), San Miguel (Panacan), St. Francis Xavier (Tibungco) ug St. Francis of Assisi (La Verna Hills).

Gitambongan kining naasoy nga Misa ug pag-abli sa maong balaang pultahan ni Fr. Lando Mandreza, Kura Paroko ug ni Fr. Armand Bacalso, usa ka pari sa kongregasyon nga Cavanis nga nag-alagad usab sulod sa maong vicariate.

Gidugang ni Msgr. Rodulfa nga ang simple apan nindot nga pultahan nagpahinumdom sa atong Ginoong Hesukristo nga mao ang atong pultahan.

Unang giablihan ang balaang pultahan sa San Pedro Cathedral mismo sa atong halangdong Arsobispo sa Davao ug CBCP President, Most Rev. Romulo G. Valles, D.D. niadtong milabay nga Abril 4. Misunod usab sulod sa Oktaba sa Pasko ang mga parokya sa Sto. Rosario (Toril), Immaculada Concepcion (Penaplata), St. Jude Shrine (Malvar), Most Sacred Heart of Jesus Parish (Calinan) ug Sta. Ana Shrine Parish (Sta. Ana Avenue).

Gidayeg ni Msgr. Rodulfa ang mga parokyano pinangulohan sa ilang Kura Paroko tungod sa “maayo ang pagpangandam, dili lang sa kalimpyo sa pisikal sa simbahan apan bisan sa atong disposisyon alang sa pagsaulog niining talagsaon nga adlaw, Oktaba sa Pasko.”