GKK, Gifted to Give (Part 3)

(An excerpt of the talk of the Most Rev. Medil Aseo, D.D., Bishop of Tagum, March 26, 2021 during DXGN Online Recollection)

Kini nga larger theological divisions sa mga pundok sa mga parokya, dunay mobarog nga gitawag nila nga Vicar Foranes. Ug dinhi nakita nga mapasayon gyud diay ang mga meetings ug mga communication, instead nga mag-iya-iya lang.

Dinhi nako nahibaloan ang mga prinsipyo, niadtong gamay pa ko, unsa diay ning mga GKK, Gagmay’ng Kristohanong Katilingban, nga aron mabuhi ug mapadayon ang mga katilingbanong kalihukan, kinahanglan nga adunay magdumala, nga mao ang pangulo. Kini siya pillion ni siya sa katilingban. Ug duna pud laing gitan-aw nila nga ila pung gipili pero dili na sa eleksiyon aron motan-aw sa mga pagtulon-an. Example sa mga catechism para sa mga kabataan. Busa nangita sila og mo-volunteer kung may kasinatian niani. Ug sa pagpadayon sa mga pag-ampo sa katilingban, nagpili pud ni sila og mga mangunahan sa pag-ampo nga gitawag nato nga kaabag. So, mao ni ang sinugdanan sa mga pwersa sa katilingban. Ang president, unya later on nadugangan man ni og mga opisyales sa mga lain-laing apostolado, ang katekista ug ang kaabag.

So, niining tungora, side by side sa mga Maryknol nga mga pari kansang mga pamaagi nakagikan sa South America, sa parte ug pagdumala sa mga GKK. Kay actually, sumala sa mga point of view sa mga Maryknolls, ang sinugdanan gyud sa Gagmay’ng Kristohanong Katilingban gikan sa ilang laing mga misyon sa laing nasod, labina didto sa South America. Kay didto man ni nagsugod ang teknolohiya sa Gagmay’ng Kristohanong Katilingban nga gi-transport dinhi sa mga paring Maryknoll diri sa Diocese sa Tagum.

Ang mga pundok pud sa unang mga paring Pinoy milambo pud tungod sa impluwensiya sa mga Maryknoll ug bunga sab sa ilang mga research, kay lagi dili man pud sila magpaulahi sa natad sa pagmugna og mga katilingban. Ang paglambo sa usa ka katilingban, nakadasig usab sa mga silingan nga mga katilingban.

Sa nag-anam na og kadaghan, na-organize pa ang mga dagkong pundok formally, ug mga deaneries. Mao nga nadungog nato ang Nabunturan deanery, Tagum deanery, Panabo deanery, Lupon deanery ug Mati deanery, nga naglangkob sa tibuok Diocese sa Tagum, nga mao lagi na ang del Norte, Oriental, Mati, usa ra na ka Diocese sa una, under ni Bishop Reagan.

Samtang ingon niini ang development sa GKK sa Diocese sa Mati ug Tagum, under sa mga Maryknoll, duna sab mga kalainan ug peculiarities. Ang pag develop sa GKK sa Diocese sa Davao ubos sab sa paggiya sa mga PME Fathers, mga misyonaryong kaparian nga gikan sa Province of Quebec, nga mao ang mga pioneering group of missionary priests diri pud sa Davao ug sa Digos.

Dinhi sa Davao, ginahimo ang mga Mindanao-wide nga mga Theological reflections nga gitawag nato og MSPC, buot ipasabot Mindanao-Sulu Pastoral Conference. Forum kini of Theological input nga giapilan sa mga kaobispohan, clergy ug religious, ug mga layko nga nagtigom sa matag karon ug unya.

Ang mga panghuna-huna sa MSPC nakahatag kaayo og pagdasig ug direksiyon sa mga Gagmay’ng Kristohanong Katilingban dinhi sa Davao ug sa Digos ug sa Tagum. Ang first gathering sa MSPC was held in 1971 sa Davao City sa tema nga “Building Christian Communities, Worshipping, Teaching and Serving”.