Pultahan sa Pagtoo Gi-ablihan 500 ka Tuig sa Pilipinas

Dugang kalipay ang gisaulog atol sa Pasko sa Pagkabanhaw sa paghandom sa labing unang Misa nga nahitabo sa yuta sa Pilipinas 500 ka tuig na ang milabay, nga gisimbolo sa dungan nga pag-abli sa Holy Door kon Pultahan sa Pagtoo (Holy Door) Abril 4, 2021.

Hiniusang gikasabutan sa ka-Obispohan sa Pilipinas (Catholic Bishops Conference of the Philippines) kinsa gipanguluhan ni Davao Archbishop Romulo G. Valles, D.D. nga dungan nga pagaablihan ang Holy Door sa gipili nga mga Jubilee Churches atol sa Pasko sa Pagkabanhaw nga mao usab ang timaan sa pormal nga paglusad sa kasaulogan sa Jubilee sa ika-500 nga tuig sa Kristiyanismo sa Pilipinas.

Pormal nga gihimo ang deklarasyon sa Jubilee Church ug solemn nga pag-abli sa Balaang Pultahan sa Archdiocese of Davao alas-9 ang takna sa buntag sa San Pedro Cathedral ni Arsobispo Valles.

Sa simple ug hamubo nga introductory rites atubangan sa ganghaan sa San Pedro Cathedral, pormal nga giablihan ang Holy Door pinaagi sa pag-insenso niini dayon miagi ang Balaang Pulong, gisundan sa imahe ni Santo Niño.

Gibutyag ni Arsobispo Valles atol sa iyang homiliya nga dunay pito ka mga Jubilee Churches sa arkidayosis lakip na niini ang San Pedro Cathedral nga paga-ablihan sulod sa Oktaba sa Pasko sa Pagkabanhaw.

Bisan ug gi-atubang pa sa katawhan ang makahahadlok nga pandemiya sa coronavirus, apan, siya midugang, nga matud pa ni San Pablo, nagpanaw kita (ibabaw sa kalibutan) diha sa pagtoo ug dili sa mga makita.

Busa, tungod sa maong pagtoo, maka-ingon ang mga Kristyanos nga Balaan ug Malipayon nga Pasko sa Pagkabanhaw!

Siya midugang nga ang panghitabo 500 ka tuig nga ang milabay, aktuwal nga panghitabo sa kasaysayan ug dili base sa doktrina o teoriya.

Unang gi-ablihan sa Ginoo ang balaang pultahan padulong kaniya niadtong higayona diin gi-presentar si Hesukristo pinaagi sa Yukaristiya. Ug gikan niadtong tungora, gipasa ngadto sa misunod nga mga henerasyon ang maong panghitabo hangtod karon diin “kita” ang mga buhing ebidensiya niini.

“Actual events… since the beginning – Santa Misa – ang paghandom sa pag-antos, pagkabanhaw sa Ginoo. Kada Misa, ilabi na sa Domingo, kanunay gisaulog ang Huwebes Santo, Biyernes Santo, Sabado Santo ug Domingo sa Pagkabanhaw,” si Arsobispo Valles nagkanayon.

“This Easter Sunday is more , added note of joy as always kay puno na man ni kay Easter Sunday tungod kay 500 years ago, ang atong mga katigulangan, wala pa hinganli ug Pilipino, pero ang atong mga katigulangan pirmero silang nakatambong sa labing unang Misa. Apan, girecord gyud ni Pigaffeta , ang chronicler ni Magellan. March 31, 1521 mao ni ang Easter Sunday Mass,” siya midugang.

“Nevertheless it was God who planted the small seed of faith. God writes straight ion crooked lines. Looking back, it was God’s plan.”

Pinaagi sa pagtugot sa Santo Papa nga gihangyo sa CBCP pinaagi sa pagsulat ni Arsobispo Valles, nga ideklara ang pipila ka mga Jubilee Churches sa Pilipinas ingon man sa pag-abli sa mga Holy Doors niini, aron dili magtapok ang mga tawo tungod sa pandemiya.

Dugay na matud pa nga tradisyon ang pag-abli sa Balaang Pultahan sa simbahan.

Sa pag-agi sa Holy Door, gi-aghat ni Arsobispo Valles ang katawhan sa pag-ampo: “Lord, I will pass again through you, through the door, calling the intercession of the Blessed Mother ug sa mga Santos sama kang San Pedro, San Lorenzo Ruiz, San Pedro Calungsod, tabangi kami.’

Sa iyang panapos, siya namahayag nga, “Mao kadto ang adlaw nga gihimo sa Ginoo, sa pagduol Kaniya—ang nag-inusara nga makahatag sa matuod nga kahulugan ug kalipay sa kinabuhi.”