National Day of Consecration to St. Joseph pangandaman

“Giimbitar ko kamo, kung gusto kamo gyud moapil niini, bantaye ninyo, i-live stream kini sa St. Joseph sa 6:30 in the morning sugod March 26 ug isibya usab kini sa DXGN 89.9 Spirit FM, i-live stream 8:30 sa gabii.”

Nagdapit sa tanan ang halangdong Arsobispo sa Davao ug CBCP President, Most Rev. Romulo G. Valles, D.D., sa pag-apil sa 33 ka adlaw nga pagpamalandong isip pagpangandam sa Consecration to St. Joseph.

Si Arsobispo Valles midasig nga moapil ang tanan pinaagi sa pag-ingon, “Dunay 33 days nga mga sessions to prepare aron nindot ug kinasing-kasing ang atong Akto sa konsagrasyon kang St. Joseph. Pagasugdan kining 33 sessions of prayer, reflection ug pagpanudlo karong March 26 unya sa May 1 mao ang Akto sa Consecration to St. Joseph.”

Kining maong usa ka tuig nga kasaulogan gideklara ni Santo Papa sugod niadtong Disyembre 8, 2020 ug matapos Disyembre 8, 2021. Giklaro ni Arsobispo Valles nga, “Ang May 1 pud dili lang sa Davao. Mao ang gikauyonan sa mga kaobispohan nato nga National Day of Consecration sa tanan ngadto kang St. Joseph.”

Ang maong kalihukan nga nagsugod na niadtong milabay nga Marso 26. Maputol kini sa Huwebes, Biyernes ug Sabado Santo sa Semana Santa ug mopadayon sa Domingo sa pagkabanhaw sa atong Ginoo.

Nagpasalamat si Arsobispo Valles nga dinhi sa Davao, aduna kitay atong parokya sa St. Joseph diha sa Sasa nga, “maoy manguna gayod sa mga kalihukan aron daghan nato, dili lang sa parokya sa St. Joseph ang makasaulog gayod sa husto ug angayan sa mabungahong paagi niining Year of St. Joseph.”

Kining maong consecration, matod ni Arsobispo Valles, “mao ang solemne ug kinasing-kasing nga pag-ampo, paghalad nato ngadto sa Dios pinaagi kang San Jose.”

Nanghinaut ang arsobispo, “unta nga mabungahon ang atong pagsaulog niining tuig ni St. Joseph.”