Diosnong Kalooy, dangpanan ug kapahulayan atol sa pandemiya

Mao kini ang tema alang sa kasaulugan sa Kapistahan sa Domingo sa Diosnong Kalooy ning tuiga, kon usa ka tuig gikan sa milabay nga kapistahan nga gipahamtang ang kwarentinas tungod sa pandemya sa COVID-19.

Gitakda matag ikaduhang Domingo sa Pasko sa Pagkabanhaw ang kapistahan sa Diosnong Kalooy. Nahasulod kini sa Oktaba kon walo ka adlaw sa Pasko sa Pagkabanhaw.

Base kini sa gipadayag ni Hesukristo ngadto kang St. Maria Faustina Kowalska niadtong tuig 1930 nga buot Niya nga maghimo ug pinasahi nga adlaw sa Kapistahan nga saulogon sa Domingo human sa Pasko sa Pagkabanhaw.

Karon, gitawag kini nga kapistahan sa Divine Mercy Sunday, nga giproklama ni Pope St. Pope John Paul II atol sa canonization ni St. Faustina niadtong Abril 30, 2000.

Niadtong milabay nga tuig, gi-aghat ni Papa Francisco ang kanasuran sa pagpadaplin sa hinakog nga walay pagtagad atol sa pandemya sa coronavirus.

Mao kadto ang panahon nga nagka-grabe ang pagkuyanap sa pandemya sa Urupa ug Estados Unidos kanus-a nagpahimangno si Papa Francisco batok sa risgo nga mahiagom sa mas grabe nga virus sa Covid-19 nga mao ang gitawag nga “selfish indifference” kon ang hinakog nga walay pagpakabana.

Karon, nagpadayon sa pagkahiagom ang kalibutan sa pandemiya sa milutaw nga mga second wave ug bag-o nga mga variants.

Dinhi usab sa Dakbayan sa Dabaw, gisubli sa lokal nga gobyerno ang mga paghigpit ubos sa General Community Quarantine isip pagpangandam ug aron mahilikay sa gikahadlokan nga second wave sa coronavirus.

Apan luyo niining tanan, padayon nga gitakda sa Divine Mercy Apostalte sa Arkidayosis sa Dabaw ang mga novena nga mga misa sa nagkalainlaing mga parokya.

Gikan Marso 30, 31, Abril 4 hangtod Abril 10 isibya usab sa DXGN 89.9 Spirit FM ang hamubo nga mga pag-ampo sa Novena matag alas-3 ang takna sa hapon.

Ug sa adlaw sa kapistahan, Abril 11, i-cover live ang Santos nga Misa gikan sa San Antonio de Padua Parish sa alas-3 sa hapon alang sa ika-31 nga Pista sa Diosnong Kalouy.

Gidapit ang tanan sa pakigduyog sa Kapistahan sa Diosnong Kalouy sa lay coordinator nga si Ms. Joji Ilagan Bian, “Isaulog ang kapistahan sa Diosnong Kalooy karong umaabot na Abril 11. Ang among Tema karong ika 31 nga pagsaulog sa kapistahan sa Diosnong Kalooy mao ang ‘ Niining panahon sa Pandemya: ang atong Diosnong Kalooy maoy kahapahulayan og dalangpanan natong tanan’ . Daku ang pagsalig nato nga dili ta niya pasagdan kauban sa atong Pamilya. Atong ipadayon ang atong kusog of tinuod na pagsalig sa iyang kalooy labi na karong panahuna.”