Pagtabang sa nasunogang parokyano

Mikabat og dul-an 600 ka pamilya ang naangol sa sunog niadtong Marso 9, 2021 sa 2 ka GKK ang San Jose ug IKP, Ipil Beach nga sakop sa San Antonio de Padua Parish, Agdao. Nahibal-an nga ang maong sunog nagsugod sa usa ka panimalay duol sa bakery. Tungod sa kusog nga hangin, maoy hinungdan nga daghang panimalay ang naangin nga minugna lamang sa light materials ang kasagaran. Ang mga nasunogan anaa karon sa Don Julian Elementary School, Brgy. Vicente Duterte Gym, Mormons Church ug ang pipila anaa sa ilang mga paryente ug kasilinganan.

Pinaagi sa Parish Social Action Ministry (PSAM) pinangunahan ni Sis. Nena Cabig ug sa Parish Disaster Response Team (PDART) ni Demetrio Milallos inubanan sa Archdiocesan Social Action Center (ASAC) kang Sr. Jo Camacho, TDM nianang gabii sa Marso 9, 2021, nakahatag og food pack alang sa panihapon sa pipila ka mga nasunogan natong mga kaigsoonan. Dugang pa, gipahigayon dayon ang bagging of food packs alang sa relief operations. Mapasalamaton ang parokya sa panguna sa Kura Paruko, Padre Amado Arroyo sa mga mitabang pinansyal ug in-kinds nga mga indibidwal, grupo ug sa mga parokya sa Ascension of the Lord Parish, Sta. Ana Shrine Parish, San Alfonzo Ma. de Ligouri Parish, San Pablo Parish, St. Joseph the Worker Parish, Our Mother of Perpetual Help Parish, Our Lady of the Assumption Parish.

Panawagan sa parokya sa San Antonio de Padua niadtong adunay malumong kasingkasing nga buot mohatag sa ilang donasyong kwarta o in-kinds alang sa mga nasunogan. Palihug adtoa ang opisina sa parokya alang sa inyong kasayuran. (Gary Guivencan | San Antonio de Padua Parish)