Youth, gifted to give

Human sa pag-ampo, gisugdan ni Most Rev. Abel C. Apigo, D.D., Obispo sa dyosesis sa Mati ang iyang pagpaambit sa Lenten recollection kon pamalandong sa Kwaresma niadtong Lunes, Marso 22 pinaagi sa paghandum sa pag-anhi sa mahal nga Santo Papa nga karon San Juan Pablo II na, dinhi sa Pilipinas atol sa 10th World Youth Day sa Manila tuig 1995.

Mga duol 4 milyones ka katawhan gikan sa tibuok kalibutan ang mitambong niadtong makasaysayan nga tigom pagkalibotan sa mga kabatan-onan. Nahinumduman ni Bishop Apigo nga si San Juan Pablo II nag-ingon nga “ang mga batan-on maoy bahandi sa Simbahan. Adunay silay importante nga papel diha sa Simbahan ug diha sa katilingban.”

“Kon atong tan-awon diha sa Bibliya, adunay mga batan-on nga gitawag sa Dios aron mag-alagad kaniya,” mga pulong pang-abli ni Bishop Apigo sa iyang pagpaambit. Gibalik-lantaw ni Bishop Apigo ang pagtawag kang Jeremias, kinsa giaghat sa paghatag sa iyang kaugalingon ug kang Samuel kinsa gitambagan ni Elai aron maminaw sa tingog ni Yahweh.

Sa 1 Timoteo 1:14-15 mabasa usab ang pagtugyan sa batan-on nga Timoteo aron pagbantay sa bahandi nga gisangon kaniya uban sa paglig-on sa Espiritu Santo. Gipasabot ni bishop Apigo nga, “ang gasa sa pagpangalagad nga iyang nadawat pinaagi sa pagpandong sa iyang ulo, iya gilayon nga gipaambit ngadto sa katawhan sa Dios.”

Gibukhad usab ni bishop Apigo ang dokumento nga PCP II kon 2nd Plenary Council of the Philippines nga naghisgot sa mga batan-on nga nagkanayon: “They are the vanguard of many cause-oriented organizations and are active in the social apostolate of the Church.”

Gihagit ni bishop Apigo nga kinahanglan ang pagtagad sa mga kabatan-onan kay usahay sila mapasagdan na lamang. “In a nation that prides itself on high esteem for the family, another irony presents in our neglect of the children and youth,” gisaysay ni bishop Apigo gikan sa mao gihapong dokumento.

Mao nga sa pagbisita ni San Juan Pablo II niadtong 1995, matod ni bishop Apigo, nakita gayod ang talagsaong gasa nga anaa sa mga kabatan-onan nga mahimong ilang ikahatag alang sa katawhan. Personal kini nga nasinati ni bishop Apigo sa iyang paghandum nga mahimong Spiritual Director sa 7 pa lang siya ka bulan nga pari sa iyang pagkatudlo sa maong responsibilidad. Dinhi nakita sa Obispo ang hilabihan nga pwedeng mahimo sa mga kabatan-onan isip bahandi diha sa Simbahan.

Kining lig-on nga pagtulon-an mahitungod sa lugar sa mga kabatan-onan diha sa Simbahan mabasa usab sa Apostolic letter ni Pope John Paul II, Amici Dilecti, nga nagkanayon, “There is no doubt that this expression refers to the material possessions of which the young man was owner or heir. Perhaps this is the situation of some, but this is not typical. And therefore, the evangelist’s words suggests another way of putting the matter. It is a question of the fact that youth is in itself a special treasure of a man or woman, and most often it is live by young people as a specific treasure.”