Pagka PINIYALAN Gipuy-an

Nakita ug nabati na karon sa mga piniyalan sa Ascension of the Lord Parish ang mapasalamaton nga kinabuhi nga gipadayag pinaagi sa pagka manggihatagon.

Luyo sa giatubang nga krisis sa panglawas nga dala sa coronavirus, nahimong mas hugot pa ang pagtoo sa sobra usa ka libo ka mga piniyalan ilabi na sa mga taga Imakulada Konsepsyon nga katilingban sa Matina Gravahan.

Human nga nagamit na ang bag-ong kapilya, gisugdan dayon sa mga GKK Servant Leaders ang proyekto sa pag-ilis sa mga bangko. Target sa maong katilingban mao ang pagpabuhat ug 24 ka mga pews nga dunay maayong ludhanan isip puli sa karaan na nga mga bangko nga nangaguba na ang uban ug gi-anay na.

Sa milabay nga tuig, napabuhat ang 6 ka mga bangko gikan sa pagpanaygon niadtong pasko sa tuig 2019 ug sa mga donasyon gikan sa mga manggihatagon nga mga sakop sa komunidad.

Naundang ang paghipos ug pundo alang niini tungod sa paghiabot sa COVID 19 apan nagpadayon sa kinasingkasing nga pag-halad sa ilang hinaguan pinaagi sa commitment card sa 62 ka mga piniyalan kinsa mitahan sa ilang kaugalingon alang sa pagpaambit sa ilang panahon, talento ug bahandi.

Sa maong commitment card, ilakip ang halad financial gikan sa ilang kasingkasing matag bulan ubos sa programa sa parokya na SPIRITUALITY OF STEWARDSHIP (SOS), a Way of Life.

Busa, gikan sa nahipos usab nga mga donasyon gikan sa manggihatagong indibidwal ug sa 60% nga share sa GKK gikan sa SOS, napadayon ang pagpabuhat sa laing 6 ka mga pews ug napahimutang kini usa ka tuig gikan sa ulahing pag-ilis sa unang 6 ka mga lingkoranan.

Tungod sa nakita nga kalambuan sa kapilya sa ICC GKK, nadasig ang laing wala magpaila nga donor sa paghatag ug laing lima ka mga bangko ug gidungagan pa ug usa sa laing donor aron nga makumpleto ang ikatulong hut-ong sa mga lingkoranan.

Sa laing bahin, nadawat usab sa ICC GKK ang duha ka sertipiko gikan sa Ascension of the Lord Parish ang pasalamat sa paghalad alang sa katukuran sa ALP Multipurpose Covered Court.

Apan wala miundang ang maong katilingban sa pagtampo pinaagi sa binulan nga kontribusyon sa matag sakop isip mga piniyalan alang sa maong katuyuan.

Alang sa pipila ka sakop sa ICC GKK, dakong kalipay alang kanila nga makatampo bisan sa ginagmay nga pamaagi alang sa maayong mga katuyuan sa simbahan sanglit nasabtan na nila ang konsepto sa paghatag og balik sa mga grasya nga nadawat nga gipadayag sa kinasingkasing nga pasalamat ngadto sa Dios, isip mga matuod nga mga piniyalan.