Jubilee door ablihan na

Sa Santos nga Misa ni Arsobispo sa Davao ug CBCP President, Most Rev. Romulo G. Valles, D.D., paga-ablihan ang Jubilee door sa San Pedro Cathedral sa Arkidyosis sa Davao, Abril 4 sa alas 9:30 sa buntag. Ablihan usab ang mga Jubilee doors sa lain-laing Cathedral sa dyosesis ug arkidyosesis sa tibuok nasod sa Pilipinas sa lain-laing oras nianang adlawa.

Kini timaan sa pag-abli usab sa usa ka tuig nga pagsaulog sa 500 ka tuig sa pagka-Kristiyano sa mga Pilipino sugod nianang adlawa diin handumon ang unang Misa niadtong 1521 atol sa Pasko sa Pagkabanhaw sa atong Ginoo.

Ang Santo Papa naghatag sa gitawag nga indulhensiya plenarya sa mga magtotoong Pilipino sulod sa tuig uban sa paghimo sa mga kondisyon o tulumanon niini.

Gipasabot ni Arsobispo Valles, sa programang Tingog sa Magbalantay sa DXGN 89.9 Spirit FM niadtong milabay nga Marso 7 nga kining maong indulhensiya plenarya, “Ma fulfill sa usa ka Filipino nga matuohon pinaagi sa iyang pag-anha sa mga Jubilee churches ug mohimo ka niining butanga diha sa Jubilee churches makadawat kag plenary indulgence.”

Matod ni Arsobispo Valles nga kining indulhensiya plenarya, “ma-apply sa imong kaugalingon, o imong pangayuon para sa namatay ug dili pwede para sa uban nga buhi; kana ang pagpapas sa temporal punishment nga duna kay sala napasaylo na, ang indulgence mao ang pagpapas sa mga sala nga napasaylo na.”

Sanglit pandemic raba karon, nakahuna-huna ang mga kaobispohan sa Pilipinas nga mohangyo usab sa Santo Papa nga gawas sa mga Cathedral nga mahimong Jubilee churches, “pwede ba nga tugotan sa daghan mga churches kasagaran mga karaanag simbahan.” Mao nga human nga sila misulat sa Santo Papa, gitugotan usab kini.

Sa arkidyosesis sa Davao ang pag-abli sa laing 6 ka mga Jubilee churches mao kining mosunod: ang St. James, Bunawan karong Abril 11 sa 8:30 sa buntag, ang St. Jude Shrine Parish sa Malvar karong Abril 8, Sto. Rosaryo sa Toril sa Abril 7, ang Immaculate Conception Parish sa Penaplata sa Abril 7 sa alas 6:00 sa buntag, ang Sacred Heart Parish sa Calinan sa Abril 11, ug ang Sta. Ana Shrine Parish sa Abril 10. Ipahibalo lamang ang mga oras niini kung masiguro na kini.

Gituyo kini nga ablihan ang maong mga Jubilee doors dili atol sa Domingo aron dunay panahon ang mga silingan nga mga parokya sa pagbisita atol sa paghimo niini. Isibya kining maong kalihukan sa DXGN 89.9 Spirit FM-Davao.