Bishop Tonel: Bag-ohon ang panglantaw sa misyon (Part 1)

Sa iyang tema nga Mission: Gifted to Give, sa unang gabii, Marso 8 niining tuiga, sa gipahigayon nga online and on air recollection sa DXGN 89.9 Spirit FM, gipasabot sa Obispo sa Diocese sa Ipil, Most Rev. Julius S. Tonel, D.D., ang panginahanglan sa pagbag-o sa atong pagsabot sa misyon.

Iya unang gisaysay nga ang mga kaobispohan sa Pilipinas nakadesisyon nga mopili sa temang Gifted to Give nga nakasentro sa hagit sa pagkamisyonero. Kini human nga ang mga Pilipino nahimong mga Kristiyanos tungod sa mga misyonero.

Gipasabot ni Bishop Tonel nga kining maong pagsaulog isip Hubileyo sa Pilipinas naghandum sa gasa sa pagtoo. Sulod na sa 500 katuig isip mga binunyagan angayan lamang nga magsaulog uban sa dakong pasalamat sa gasa sa pagtoo nga nadawat ug sa pagpaambit niini ngadto sa tibuok kalibutan.

Iyang gipalawman nga gikinahanglan nato ang kausaban sa pagsabot sa matuod nga kahulogan sa misyon subay sa mga gipanudlo sa atong Simbahan. Kining kausaban anaa diha sa atong pagsabot sa gigikanan sa misyon, sa tumong sa misyon, sa pamaagi sa misyon ug sa nagtukmod sa misyon.

Matud ni Bishop Tonel nga ang Batikano II nagtudlo nga ang gigikanan sa misyon dili ang Simbaha, kondili ang Santisima Trinidad. Ang dokumento nga Ad Gentes nga gipagula sa Ikaduhang Konsilyo Batikano mahitungod sa misyon nagsubay nga ang misyon gikan sa pagpadala sa Dios Amahan sa Anak ug sa Espiritu Santo aron pagpatuman sa plano sa Dios sa kaluwasan sa tanan.

“Ang misyon,” dugang ni Bishop Tonel, “dili buhat sa Simbahan, kondili kinaiya kini sa Dios.” Ang Dios mismo Dios sa misyon. Ang misyon lihok sa Dios ngadto sa kalibotan. Ang Simbahan instrumento sa misyon. Mao nga adunay Simbahan tungod kay dunay misyon. Ang misyon dunay Simbahan, dili kay ang Simbahan dunay misyon.

Gipaklaro ni Bishop Tonel nga ang Santisima Trinidad kahiusahan ug komunikasyon, pakiglambigit ug diyalogo sa Amahan, Anak ug Espiritu Santo. “Ang misyon dili padaghanay kondili pakighiusa,” dugang niya.

“Adunay misyon dili tungod kay sugo kini sa Simbahan. Adunay misyon tungod kay ang Dios Santisima Trinidad,” pagpalawom ni Bishop Tonel. Mao nga ang misyon dili mahitungod sa buluhaton sa Simbahan kondili nagpadayag kini kung kinsa ang Dios.

Unsa man ang angay nga pagsabot sa tumong sa misyon? Kini ang ikaduhang hagit ni Bishop Tonel sa iyang pagpamalandong.

Gipatin-aw ni Bishop Tonel nga ang tumong sa misyon modagayday gikan sa pagsabot sa gigikanan sa misyon: “Ang tumong sa misyon dili ang Simbahan kondili ang kinatibuk-ang plano sa Dios sa kaluwasan sa tanan. Ang tumong sa misyon dili lamang ang pagpadako sa sakop sa Simbahan sa mga lugar sa kalibotan kondili ang malukpanong plano sa Ginoo nga maluwas ang tanan.”

Si San Pablo naghisgot sa kahiusahan sa tanang butang sa langit ug sa yuta (Eph. 1:10) o sa pakig-uli sa tanang butang diha ni Kristo (Col 1:20). Ang Gipadayag nagsaysay usab sa pagtungha sa bag-ong langit ug bag-ong yuta (Gip. 21:1-4).

Migamit si Bishop Tonel sa mga teksto sa Ebanghelyo nga nagbasabot sa buhat sa pagpangluwas ni Kristo. Diha sa Lukas 4:16-30 gipadayag ni Kristo sa iyang pagpamulong didto sa sinagoga ang iyang laraw sa pagsugod sa iyang misyon. Gipatunhay ni Kristo ang panagna ni Isaias (61:1f) nga pagdalag “maayong balita ngadto sa mga kabos, kagawasan sa mga binilanggo, panan-aw ngadto sa mga buta, kalingkawasan sa mga dinaog-daog.”

Gidasig usab ni Bishop Tonel ang tanan sa pagpamalandong nga si Kristo usab naghimo sa iyang misyon ngadto sa ubang mga lugar aron pagsangyaw sa Maayong Balita sa Gingharian sa Dios tungod kay kini ang tuyo nganong gipadala siya sa kalibotan (Lk. 4:43).

Dili mao ang tumong sa misyon, matod niya, ang pagpalabwanay ug patas-anay. Dili makatabang ug sukwahi sa pagsabot sa misyon ang pagpasigarbo kung kinsay mas hawod ug maayo. Ang misyon makapahiusa ug dili makapatibulaag.

Gipaundan usab ni Bishop Tonel ang iyang pamalandong sa pipila niya ka mga kasinatian isip ikatulong Obispo sa Ipil. Kining maong lugar diin siya nadestino isip Obispo, lugar usab diin dakong hagit ang misyon sa Dios nga gisangon sa Simbahan.