Holy Doors paga-ablihan

Pagaablihan ang Holy Doors sa 7 ka mga gitakdang Jubilee churches sa Arkidyosis sa Davao sa nagkalain-laing mga petsa niining tuiga.

Gibutyag ni Arsobispo sa Davao ug CBCP President, Most Rev. Romulo G. Valles, D.D., nga ang pag-abli sa Jubilee Door sa San Pedro Cathedral pagahimuon karong umaabot nga Pasko sa Pagkabanhaw sa atong Ginoo, Abril 4, 2021.

Giawhag ni Arsobispo Valles nga ang laing 6 ka mga parokya sa Arkidyosis sa Davao nga napili ug giaprobahan ni Santo Papa Francisco nga mamahimong Jubilee church mag-abli usab sa ilang tagsa-tagsa ka mga Jubilee doors atol sa usa ka misa sigun sa ilang mapili nga mga petsa sulod sa Oktaba sa Pasko kon sulod sa unang semana sa Pasko sa Pagkabanhaw sa atong Ginoo.

“Kining 7 ka mga simbahan gitugotan ug gipili sa Santo Papa human sa atong rekomendasyon ug application didto sa Roma,” matod pa ni Arsobispo Valles. Gipili kining maong mga simbahan kon parokya aron adunay mabisitahan ang matag vicariate niining tuig sa hubileyo.

“Kining maong mga parokya gipili tungod sa ilang kaimportansiya sa maong lugar ug vicariate dinhi sa Arkidyosis,” dugang ni Arsobispo Valles.

Sulod niining tuiga sa hubileyo sa Pilipinas sa pagsaulog sa hubileyo sa ika-500 nga kasumaran sa pagka-Kristiyanos, adunay usab madawat nga indulhensiya plenarya ang mga mobisita niining maong mga parokya human niya mahimo ang mga tulumaon nga gitakda subay niini.

Ang maong mga Holy doors himoon sa naasoy nga mga simbahan kon parokya isip simbolo sa pagdawat sa grasya niining hubileyo, ilabina ang grasya sa kabag-ohan.

Sa San Pedro Cathedral, kataposang higayon ang pag-abli niini niadtong tuig sa hubileyo sa kalooy nga gideklara ni Santo Papa Francisco.

Atangi lamang ang pagpahibalo sa mga petsa kung kanus-a himuon ang pag-abli niini sa mosunod nga nga adlaw. Paningkamotan sa atong social communications apostolate ang pag-cover niining maong pag-abli sa mga Holy doors aron makasaksi usab kadtong dili makahimo sa pagbisita niining panahon sa pandemya.